«Wildberries» Ўзбекистонда 7 500 кишини иш билан таъминламоқчи. Янги лойиҳа тафсилотлари

Россиянинг йирик маркетплейси — «Wildberries» Тошкент вилоятида кўп тармоқли логистика мажмуасини қуриш бўйича Ўзбекистон Инвестициялар, саноат ва савдо вазирлиги билан инвестиция шартномасини имзолади. Лойиҳа пойтахтга туташ Зангиота туманида амалга оширилади. Компания хабарига кўра, марказда камида 7 500 та янги иш ўрни яратиш ва махсус таълим дастурлари орқали 2 000 нафар мутахассисни тайёрлаш режа қилинган.

Маълумотларга кщра, ушбу битим 2026 йил 6 октябр куни Фарғонада ўтган Россия ва Ўзбекистон ҳудудлари кенгашининг учинчи йиғилиши доирасида имзоланган.

Логистика мажмуаси қаерда қурилади?

Янги марказ Тошкент вилоятининг Зангиота туманига қарашли «Боғзор» маҳалласида, Тошкент шаҳрининг Янгиҳаёт туманига чегарадош ҳудудда барпо этилади. Ушбу йирик лойиҳа учун 67,3 гектар ер майдони ажратилган.

Ҳозирги кунда лойиҳалаш ишлари давом этмоқда. Қурилишни 2026 йил октябр ойи охирида бошлаш мўлжалланган. Аммо мажмуанинг қачон тўлиқ фойдаланишга топширилиши бўйича аниқ сана очиқланмаган.

Шартномага кўра, компания объектни ўз вақтида ишга тушириш мажбуриятини олган. Лойиҳанинг асосий мақсадлари сифатида инсон капиталини ривожлантириш ва маҳаллий маҳсулотларни хорижий бозорларга экспорт қилишни кенгайтириш кўрсатилган.

Лойиҳа қиймати қанча? Манбаларда турли рақамлар бор

«Wildberries» логистика марказини қуриш масаласини бир неча йилдан буён муҳокама қилиб келади. Шу давр мобайнида лойиҳанинг майдони ва унга киритиладиган инвестиция ҳажми бир неча бор ўзгарди.

2023 йил октябр ойида компания Тошкент вилоятида 150 минг квадрат метр майдонга эга логистика маркази қуриш ва бунга 140 миллион долларгача маблағ йўналтириш ниятини билдирган эди. Ўшанда объект 2025 йилда очилиши режалаштирилганди.

2025 йил июнга келиб эса ««Wildberries» & Russ» компаниясининг бош ижрочи директори Роберт Мирзоян лойиҳа кўлами кенгайтирилиб, 180 минг квадрат метр майдондаги омбор мажмуаси қурилиши ҳақида маълум қилди. Унинг сўзларига кўра, лойиҳага йўналтириладиган инвестиция ҳажми 150 миллион долларни ташкил этиши кутилган.

2026 йил июн ойига келиб, Мирзоян ««Wildberries» & Russ» Ўзбекистон иқтисодиётига логистика инфратузилмаси ва янги хизматларни ривожлантириш учун 300 миллион доллардан ортиқ сармоя киритмоқчи эканини эълон қилди. Бироқ бу маблағ фақат битта янги логистика марказининг қиймати эмас, балки кенг қамровли инфратузилма ва хизматлар лойиҳасининг умумий бюджетидир. Унинг фикрича, бу минтақавий хаб «Wildberries» нинг Тошкентдаги мавжуд саралаш марказини, қурилаётган янги омбор мажмуасини ва компаниянинг бошқа давлатлардаги объектларини ягона тизимга бирлаштириши лозим.

«Wildberries» нега минтақавий логистика хабини қурмоқчи?

Компаниянинг эълон қилган асосий мақсадларидан бири — Ўзбекистонда ишлаб чиқарилган товарларни хорижий бозорларга, хусусан, жаҳон бозорига олиб чиқиш имкониятларини кенгайтиришдир.

2026 йил июнда Роберт Мирзоян Ўзбекистондаги логистика тизимини Россия, Марказий Осиё ва Яқин Шарқ бозорларини бирлаштирадиган кўприкка айлантириш режаси ҳақида гапирганди. Шунингдек, компания Хитойдан келадиган товарларни Ўзбекистон орқали Африка бозорларига экспорт қилиш имкониятларини ҳам ўрганмоқда.

Ушбу логистика мажмуаси нафақат Ўзбекистондаги харидорларга буюртмаларни тезроқ етказишга, балки маҳаллий ишлаб чиқарувчиларга ўз маҳсулотларини халқаро маркетплейс орқали глобал миқёсда сотишга ёрдам бериши керак. Компания буни мамлакатнинг экспорт салоҳиятини ошириш ташаббуси билан боғламоқда.

Ўзбекистон товарлари «Wildberries» орқали қанча миқдорда сотилмоқда?

«Wildberries & Russ» раҳбарияти тақдим этган маълумотларга кўра, 2025 йилда платформа орқали Ўзбекистонда ишлаб чиқарилган товарлар савдоси ҳажми 1,4 миллиард доллардан ошган.

Маҳаллий маҳсулотларни онлайн савдода кенгроқ тарғиб қилиш бўйича махсус лойиҳа ҳам бор. Инвестициялар, саноат ва савдо вазирлиги билан ҳамкорликда «Wildberries» 2025 йилнинг май ойида ўз сайтида «Ўзбекистонда ишлаб чиқарилган» (Made in Uzbekistan) номли махсус бўлимни очган. Вазирлик хабарига кўра, бу бўлимга тўқимачилик, косметика, уй-рўзғор буюмлари ва озиқ-овқат маҳсулотлари жойлаштирилади. Товарлар ушбу рўйхатга киритилиши учун уларнинг ҳақиқатан ҳам Ўзбекистонда ишлаб чиқарилгани тасдиқланиши талаб этилади.

Янги логистика мажмуаси компаниянинг ўзбек товарларини ташқи бозорларга олиб чиқиш режасига тўла мос келади. Бироқ унинг экспортга реал таъсири мажмуанинг қачон ишга тушишига, қандай қувват билан ишлашига ва маҳаллий тадбиркорлар ундан қанчалик фаол фойдаланишига боғлиқ.

Россиядаги омборларга қилинган дрон ҳужумлари лойиҳага таъсир қилдими?

«Wildberries» ўзининг Марказий Осиёдаги логистика тармоғини кенгайтириши фақат Ўзбекистон билан чекланиб қолмаган. «Eurasianet» нашрининг 2026 йил 8 октябрдаги таҳлилий мақоласида компания Қозоғистонда (Остона ва Олмаота яқинида) ҳам янги омборлар қуриш бўйича келишувларга эришгани қайд этилади. Нашр бу кенгайиш ҳаракатларини Россия ҳудудидаги «Wildberries» омборларига Украина дронлари томонидан уюштирилган ҳужумлар билан боғлаб таҳлил қилади.

Эслатиб ўтамиз, «Reuters» агентлиги 2026 йил 24 июл куни Россиядаги бир нечта «Wildberries» омборларига дронлар орқали зарба берилгани ҳақида хабар қилган эди. Компания ва Россия расмийлари ҳужумлар оқибатида омборлар ишида вақтинчалик узилишлар кузатилганини тасдиқлаган.

Аммо «Wildberries» Ўзбекистондаги янги мажмуани айнан мана шу ҳужумлардан қочиш мақсадида қураётганини расман тасдиқлагани йўқ. Компания ўз баёнотларида доимо асосий сабаб сифатида инфратузилмани кенгайтириш, минтақавий товар айланмасини тезлаштириш ва маҳаллий экспортни қўллаб-қувватлашни кўрсатиб келади.

Бу лойиҳа Ўзбекистон учун нимани англатади?

Маълум қилинган режаларга кўра, Зангиотадаги логистика маркази бирйўла бир нечта вазифани ечиши кутилмоқда: омбор инфратузилмасини кенгайтириш, минглаб янги иш ўринларини яратиш, ёш мутахассисларни тайёрлаш ва ўзбек маҳсулотларининг экспорт географиясини кенгайтириш.

Аммо лойиҳанинг асл иқтисодий самарасини баҳолаш учун ҳали бир қатор муҳим маълумотлар очиқланиши керак. Хусусан, мажмуанинг аниқ инвестиция қиймати, ишга тушиш муддатлари, омборнинг тасдиқланган қуввати ва экспорт ҳажмига таъсирини кўрсатувчи реал кўрсаткичлар ҳануз номаълумлигича қолмоқда.

Ҳозирча аниқ фактлар шулардан иборат: инвестиция шартномаси имзоланган, қурилиш учун 67,3 гектар ер майдони белгиланган ва компания 7 500 та иш ўрни яратиб, 2 000 кишини ўқитишни режа қилган. Лойиҳанинг мамлакат иқтисодиётига таъсири эса ана шу режаларнинг амалда қай даражада ижро этилиши билан ўлчанади.