ЙИ Қирғизистон ва Қозоғистон компанияларини «қора рўйхат»га киритди
Россияга қарши янги санкциялар пакетига жами 170 та ташкилот ва 48 киши киритилди. Шунингдек, 94 та банк ва молиявий ташкилот активлари музлатилди, айрим банклар ҳамда криптовалюта платформалари билан операциялар чеклаб қўйилди.
© Foto: RIA NovostiЕвропа Иттифоқи Россиянинг ҳарбий-саноат комплекси, молия тизими ва аввалги санкцияларни четлаб ўтиш схемалари билан боғлиқ деб ҳисобланган ташкилотларга 21-сонли янги чекловлар пакетини тасдиқлади. Унда Қирғизистон ва Қозоғистон компаниялари ҳам бор.
Санкциялар рўйхатига Қирғизистоннинг «EkoIslamicBank» банки киритилди. Европа Иттифоқи маълумотларига кўра, банк Россиянинг чеклов остидаги молиявий хабарлар узатиш тизими (SPFS) дан фойдаланади. 13-августдан бошлаб Европа Иттифоқи компанияларига ушбу банк билан ҳар қандай молиявий операцияларни амалга ошириш тақиқланади.
Шунингдек, Россиянинг ҳарбий-саноат комплексига ёрдам берганликда гумон қилинаётган Марказий Осиёнинг 5 та компаниясига қарши чоралар кўрилди. Улар орасида Қирғизистоннинг «Нова Проект», «Rama group», «Шисан» компаниялари ҳамда Қозоғистоннинг «TauKZ» ва «KBR Tekhnologii» компаниялари бор. Ушбу ташкилотларга 24-июлдан бошлаб кучайтирилган экспорт назорати жорий этилди.
Янги санкциялар пакетига жами 170 та ташкилот ва 48 киши киритилди. Шунингдек, 94 та банк ва молиявий ташкилот активлари музлатилди, айрим банклар ҳамда криптовалюта платформалари билан операциялар чеклаб қўйилди. Европа Иттифоқи ушбу пакетни сўнгги тўрт йил ичидаги энг йирик санкциялар тўплами деб атади. Чекловлар Россиянинг мудофаа, энергетика, кончилик соҳалари ва санкцияларни четлаб ўтишда гумон қилинган молиявий тармоқларига ҳам тааллуқли.
Эслатиб ўтамиз, аввалроқ АҚШ 60 та давлатга, жумладан Қозоғистон ва Россияга янги импорт божларини киритганди.
