Кремл: Ҳиндистон нефт харидини тўхтатиш ҳақида Россияга хабар бермади
Ҳиндистон ҳукумати ҳозирча Россияга нефт импортини тўхтатиш ҳақида расман маълум қилмаган. «Reuters» агентлиги маълумотларига кўра, ҳинд нефтни қайта ишлаш заводлари ҳам ҳали ҳукуматдан Россиядан харидларни тўхтатиш бўйича кўрсатма олмаган.
Москва Ҳиндистондан Россия нефтини харид қилишдан воз кечиш ҳақида ҳеч қандай хабар олмаган. Бу ҳақда бугун, 3 феврал куни Кремль матбуот котиби Дмитрий Песков АҚШ президенти Доналд Трампнинг баёнотларига изоҳ бераётганида маълум қилди.
«Ҳозиргача бу масала бўйича Деҳли томонидан қандайдир баёнотларни эшитганимиз йўқ», – деди Песков.
«Moody’s»: Ҳиндистон Россиядан нефт импортни дарҳол тўхтата олмайди
АҚШнинг «Moody’s» рейтинг агентлиги фикрича, сўнгги ойларда Россиядан нефт хомашёси импорти қисқарганига қарамай, Ҳиндистоннинг Россиядан нефт харидини дарҳол тўлиқ тўхтатиши эҳтимоли паст. «Moody’s» ҳисоботида айтилишича, бу ҳолат «Ҳиндистон иқтисодий ўсишига путур етказиши мумкин».
«Reuters» агентлигининг манбаларга таяниб ёзишича, ҳинд нефтни қайта ишлаш заводларига ишлаб чиқаришни қисқартириш учун муайян вақт керак бўлади ва Ню Деҳли ҳукумати ҳали уларга Россиядан импортни тўхтатиш ҳақида расмий топшириқ бермаган.
Трамп: Моди Россия нефтини харид қилишни тўхтатишга рози бўлди
Бундан бир кун аввал Трамп Ҳиндистон бош вазири Нарендра Моди у билан бўлган суҳбатда Россия нефтини харид қилишни тўхтатишга рози бўлганини айтган эди. Трампнинг сўзларига кўра, Ҳиндистон АҚШдан, эҳтимол, Венесуэладан нефт харидини оширишга тайёр.
«Бу ҳозир давом этаётган ва ҳар ҳафта минглаб одамлар қурбон бўлаётган Украинадаги урушни ТЎХТАТИШГА ёрдам беради!» — деб ёзди Трамп «Truth Social» платформасида.
У, шунингдек, Вашингтон Ҳиндистон учун савдо божларини дарҳол 25 фоиздан 18 фоизга туширишга рози бўлганини таъкидлади.
Ўз навбатида, Моди «X» ижтимоий тармоғида АҚШ президенти билан «ажойиб» суҳбат бўлганини ёзди.
«Дунёдаги икки йирик иқтисодиёт ва энг катта демократиялар биргаликда ишласа, бу халқларимизга фойда келтиради ва ўзаро манфаатли ҳамкорлик учун улкан имкониятлар очади», – деб қўшимча қилди у.
АҚШнинг “Лукойл” ва “Роснефт”га қарши санкциялари
Октябр ойида АҚШ Россияга қарши янги санкциялар жорий қилди. Бу қарор Москва томонидан Украинага қарши бошланган урушни тугатиш бўйича «жиддий тинчликка интилиш йўқлиги» билан изоҳланган. Қора рўйхатга Россиянинг икки йирик нефт компанияси – «Роснефт» ва «Лукойл», шунингдек, уларнинг Россия ҳудудида жойлашган шўъба корхоналари киритилди.
Қоидаларни бузганлик учун АҚШ фуқаролари ва хорижий фуқароларга нисбатан «фуқаролик-ҳуқуқий ёки жиноий санкциялар» қўлланилиши мумкинлиги айтилди. Шундан сўнг Хитой ва Ҳиндистон Россия нефти импортини кескин қисқартириши мумкинлиги ҳақида хабарлар пайдо бўлган эди.
