Кубада 2–3 ҳафтага етадиган нефт захираси қолди

Кубада нефт ва мазут захиралари кескин камайиб, мамлакат ҳозирги истеъмол суръатида бор-йўғи 2–3 ҳафтага етарли ёнилғи билан қолган. Бу ҳолат АҚШ томонидан Венесуэлага нисбатан жорий этилган денгиз блокадаси ҳамда Мексикага кўрсатилаётган босим ортидан шаклланди. Орол давлат мазкур икки мамлакатни нефт ва мазутнинг асосий таъминотчиси сифатида қараб келган.

Financial Times нашри Kpler мониторинг платформаси маълумотларига таяниб, Кубанинг ҳозирги энергетик ҳолатига баҳо берди. Нашр ҳисоб-китобларига кўра, мамлакатда маҳаллий равишда қазиб олинадиган нефт ҳажми жуда чекланган бўлиб, у импорт қисқаришини қоплай олмаяпти. Айни пайтда нефт ва мазут асосан электр энергияси ишлаб чиқариш учун ишлатилади.

Йил бошидан буён қанча нефт импорт қилган?

Kpler маълумотларига кўра, жорий йил бошидан буён Кубага атиги 84 900 баррел нефть етказиб берилган. Бу кунлик ўртача 3 минг баррел импорт дегани. Таққослаш учун, 2025 йилда мамлакат кунига тахминан 37 минг баррел нефт қабул қилган.

Kpler таҳлилчиси Виктория Грабенвегернинг таъкидлашича, январ ойида келган сўнгги юк ҳамда йил бошида омборларда мавжуд бўлган тахминан 460 минг баррел нефтьни қўшиб ҳисоблаганда ҳам, Куба кўпи билан 15–20 кунгагина етказа олади.

Нефт билан бир қаторда, мазут захиралари ҳам деярли тугаб бормоқда. Бу йўналишда Венесуэла Кубанинг асосий ҳамкори бўлган. Аммо АҚШ томонидан жорий этилган денгиз қамалидан кейин юк жўнатишлар тўлиқ тўхтаган. Мазут ортилган сўнгги танкер орол давлатга ўтган йил ноябрь ойида етиб келган.

АҚШ Кубага нефт етказувчи давлатларга бож жорий қилади

AҚШ президенти Доналд Трамп Кубага нефт сотадиган ёки етказиб берадиган давлатлардан АҚШга киритиладиган маҳсулотларга қўшимча божлар жорий этишга рухсат берувчи фармонни имзолади. Қарор Кубадан келаётган «хавф ва таҳдидлар» сабаб фавқулодда ҳолат жорий этилгани билан изоҳланди. Оқ уйга кўра, мазкур чоралар АҚШ миллий хавфсизлиги ва ташқи сиёсатини ҳимоя қилишга қаратилган.

Трамп ўз баёнотида Куба ҳукумати АҚШга қарши фаолият юритувчи давлатлар ва гуруҳлар билан ҳамкорлик қилаётганини таъкидлади. Унинг айтишича, Гавана, Россия, Хитой, Эрон ҳамда халқаро террористик ташкилотлар билан алоқаларни сақлаб келмоқда. Президент фикрича, бундай ҳамкорлик АҚШ манфаатларига тўғридан-тўғри таҳдид солади.

Имзоланган фармонга мувофиқ, Кубага нефт етказиб бераётган давлатлардан АҚШ бозорига олиб кириладиган товарларга қўшимча тарифлар қўлланилиши мумкин. Бироқ тарифлар миқдори ҳозирча очиқланмади. Бу қарор нефт таъминоти занжири орқали Гаванага босимни кучайтиришга қаратилган.

Трамп аввалроқ Куба йиллар давомида Венесуэла нефти ҳисобига иқтисодий барқарорликни сақлаб келганини айтган эди. Унинг таъкидлашича, бунинг эвазига Гавана Венесуэла раҳбариятини хавфсизлик хизматлари билан таъминлаган. Энди эса, президентга кўра, «Кубага нефть ҳам, пул ҳам келмайди».

Куба расмийлари бу айбловларни қатъий рад этди. Ташқи ишлар вазири Бруно Родригес мамлакат ҳеч қачон хавфсизлик хизматлари эвазига тўлов олмаганини билдирди. Президент Мигел Диас-Канел эса Куба мустақил ва суверен давлат эканини таъкидлаб, ташқи босимни қабул қилмаслигини маълум қилди.