Яқин Шарқдаги катта тўқнашувнинг олди олинди

Саудия Арабистони, Қатар ва Уммон расмийлари АҚШ президенти Доналд Трампни «минтақадаги жиддий оқибатлар»дан қўрқиб, Эронга ҳужум қилиш фикридан қайтишга кўндиришди. Бу ҳақда AFP агентлиги Саудиянинг юқори лавозимли амалдорига таяниб хабар бермоқда.

«Форс кўрфазининг учта давлати сўнгги дақиқаларда президент Трампни Эронга ўз яхши ниятларини кўрсатиши учун имкон беришга кўндириш мақсадида узоқ давом этган ва кескин дипломатик саъй-ҳаракатларни амалга оширди. Биз АҚШга Эронга қилинадиган ҳужум минтақада бир қатор жиддий жавоб зарбаларига сабаб бўлишини айтдик», - дея AFP исми ошкор этилмаган мулозимнинг сўзларидан иқтибос келтирмоқда.

Унинг сўзларига кўра, низо авж олишининг олдини олиш мақсадида Форс кўрфази давлатларининг дипломатик алоқалари давом этмоқда.

«Саудия Арабистони бошчилигидаги араб давлатлари АҚШ расмийларидан Теҳронга зарба беришдан тийилишни сўрашган ва Эрон режимини ағдаришга уриниш нефт бозорларида беқарорликни келтириб чиқариб, якунда АҚШ иқтисодиётига зарар етказишини билдиришган», - деб хабар берган эди аввалроқ The Wall Street Journal газетаси.

Бундан ташқари, Reuters агентлигига вазият билан таниш бўлган учта манбанинг маълум қилишича, Қатардаги «Ал-Удейд» АҚШ авиабазасида 14 январ куни эълон қилинган юқори хавф даражаси пасайтирилган.

«14 январ куни базадан олиб чиқиб кетилган Америка самолётлари аста-секин қайтмоқда», - деб хабар берди манбалардан бири.

Бошқа икки манба — анонимлик шарти билан гапирган дипломатларнинг айтишича, аввалроқ базани тарк этиш тавсия этилган ходимларнинг бир қисмига ҳам қайтишга рухсат берилган.

Ўтган куни АҚШ Форс кўрфазидаги базаларида хавфсизлик чораларини кучайтирган эди. 14 январ куни Қатардаги Американинг «Ал-Удейд» авиабазасида юқори даражадаги хавфсизлик ҳолати эълон қилинган эди.