Европарламент мигрантларни учинчи давлатларга чиқаришни маъқуллади

Европа Иттифоқида бошпана бериш рад этилган нолегал мигрантлар келажакда Ўзбекистон ва бошқа қатор давлатлар ҳудудидаги махсус депортация марказларига чиқариб юборилиши мумкин. Бу ҳақда Европа парламентининг 17 июн куни бўлиб ўтган овоз бериш якунлари бўйича эълон қилинган пресс-релизида маълум қилинди.

Европарламент кўпчилик овоз билан (666 иштирокчидан 418 таси ёқлаб, 218 таси қарши, 30 таси бетараф) чет элликларни депортация қилиш бўйича янги регламентни маъқуллади. Ҳужжат ЕИда қолиш ҳуқуқига эга бўлмаган, бироқ ўз ватанига қайтариш имконсиз бўлган (масалан, уларнинг давлатлари қабул қилишни рад этгани сабабли) шахслар учун ЕИ ташқарисида «қайтиш хаблари»ни яратишни назарда тутади.

AFP ахборот агентлиги маълумотларига кўра, бундай депортация марказларини жойлаштириш бўйича ЕИнинг бўлажак ҳамкорлари сифатида Ўзбекистон, Қозоғистон, Руанда ва Уганда кўриб чиқилмоқда. Ушбу марказларни яратиш ва миграция қонунчилигини кучайтиришни Германия, Австрия ва Дания ҳукуматлари қўллаб-қувватламоқда.

Нолегалларга нисбатан санкцияларнинг кучайтирилиши

Яшаш учун рухсатномаси йўқлигига қарамай, ЕИ ҳудудини тарк этишни рад этган шахсларга нисбатан янада қаттиқроқ санкциялар қўлланилади. Бундай мигрантлар тез-тез ҳибсга олиниши ва Европа Иттифоқига қайта киришга қўйиладиган тақиқлар тизимли равишда қўлланилиши кутилмоқда.

Шунингдек, нолегал миграцияга қарши курашишнинг янги чоралари орасида нафақа тўловларини қисқартириш ёки тўлиқ тўхтатиш ҳам кўзда тутилмоқда, деб маълум қилади dpa агентлиги.

Брюсселда умид қилишларича, янги қоидалар кўпроқ нолегал мигрантларни ЕИга қабул қилиш рад этилганда ўз ватанига ихтиёрий равишда қайтиш қарорини қабул қилишга мажбур қилади. Амалдорларнинг статистикасига кўра, ҳозирда чиқариб юбориш қарори қабул қилинганларнинг фақатгина ҳар тўртинчиси амалда ўз келиб чиқиш мамлакатига қайтмоқда.

Шу билан бирга, ташаббусни танқид қилаётганлар «хаблар» яратилишининг ўзига қарши чиқмаяпти, бироқ уларни Евроиттифоқ ҳудудида қуришни талаб қилмоқда. Уларнинг фикрича, учинчи давлатларда бундай марказлардаги сақлаш шароитларини назорат қилиш қийинроқ ва мигрантлар у ерда инсоннинг асосий ҳуқуқлари бузилишига дуч келиши мумкин.

Аввалги раддиялар

Эслатиб ўтамиз, жорий йилнинг 2 июн куни Ўзбекистон ва Қозоғистон Ташқи ишлар вазирликлари «Politico» нашрининг Европа ўз ҳудудидан чиқариб юбориладиган мигрантлар учун ушбу давлатларда махсус марказлар ташкил этишни режалаштираётгани ҳақидаги хабарларини рад этган эди. Ўзбекистон ТИВ матбуот котиби Омонулло Файзиев бу масалада Европа Иттифоқи муассасалари билан ҳеч қандай музокаралар олиб борилмаётгани ва режалаштирилмаганини таъкидлаган. Қозоғистон ТИВ вакили Ерлан Жетибаев ҳам дипломатик даражада бундай музокаралар бўлмаганини маълум қилган.