2025 йил III чоракда Ўзбекистонда бўш иш ўринлари ошди
Меҳнат бозорида иш ўринлари таклифи кенгайгани билан бирга, айрим соҳаларда қисқартириш кутилмалари ҳам кучайди.
Марказий банк 2025 йилнинг учинчи чораги бўйича меҳнат бозори шарҳини эълон қилди. Ҳисоботга кўра, ушбу даврда бўш иш ўринлари таклифи барқарор ўсишни давом эттирган, номинал ва реал иш ҳақи, шунингдек, пул ўтказмалари ҳажми ҳам ошган.
Очиқ манбалар асосида олиб борилган таҳлилларга кўра, III чоракда бизнес субъектлари томонидан эълон қилинган бўш иш ўринлари ўтган йилнинг шу даврига нисбатан 3,3 фоизга кўпайган. Иш ўринларининг катта қисми савдо соҳасига тўғри келиб, унинг улуши 17,9 фоизни ташкил этган. Умумий овқатланиш соҳаси 17,1 фоиз, ишлаб чиқариш тармоғи эса 17,0 фоиз билан кейинги ўринларни эгаллаган.
Шу билан бирга, корхоналар кутилмаларида меҳнат бозорига нисбатан эҳтиёткорлик кучайгани қайд этилган. Яъни, иш ўринларини оширишни режалаштираётганлар билан бир қаторда, қисқартириш эҳтимолини билдирган респондентлар улуши ҳам ортган.
Иқтисодий фаоллик бўйича сўровномалар натижаларига кўра, келгуси уч ойда иш ўринлари сонини кўпайтиришини маълум қилган тадбиркорлар улуши июл–август ойларида ўртача 33,9 фоизни ташкил этган. Сентябр ойида эса мавсумий омиллар таъсирида бу кўрсаткич 30,8 фоизгача пасайган.
Айни пайтда, иш ўринларини қисқартиришни режалаштираётганлар улуши II чоракдаги 8,7 фоиздан III чоракда 12,7 фоизгача ўсган. Бунда асосан қурилиш соҳасидаги респондентларнинг 16,4 фоизи, савдо соҳасида эса 25,6 фоизи иш ўринларини қисқартириш эҳтимолини билдирган.
Ушбу маълумотлар меҳнат бозорида ўсиш тенденцияси сақланаётгани билан бирга, айрим тармоқларда хавф-хатарлар ва мавсумий таъсирлар кучайиб бораётганини кўрсатади.
