Алишер Қодировдан янги таклиф: аёллар учун енгил жазоларни қайта кўриб чиқилиши керак

Алишер Қодиров Тошкентда рўй берган даҳшатли воқеадан сўнг аёллар учун белгиланган енгил жазо чораларини танқид қилди. Унинг фикрича, икки ёшли боланинг ўлими учун атиги олти йил қамоқ жазоси жуда юмшоқ. Қодиров Жиноят кодексида аёллар учун мавжуд енгиллаштирувчи моддаларни қайта кўриб чиқишни таклиф қилиб, бундай «инсонийлик» жиноятларнинг кўпайишига олиб келиши мумкинлигини айтди. Воқеа 2025 йил 11 июл куни Тошкентдаги хусусий боғчалардан бирида юз берган. Суд бу шов-шувли иш бўйича ҳукм чиқарди. Терговга кўра, боғча тарбиячиси ва методисти болани мунтазам равишда калтаклаган: юзига урган, тепган, каравот ва полга отган. Сўнгги маротаба қаттиқ калтаклангач, бола ҳушини йўқотган ва икки кундан кейин касалхонада вафот этган.   Қодиров: «Бу — жиноятга ундовчи инсонийлик эмасми?» Унинг айтишича, боланинг ўлимига сабабчи бўлган тарбиячига атиги 6 йил қамоқ жазоси тайинлангани адолатсизликдир. Қодиров Жиноят кодексининг 50-моддасини мисол келтириб, аёл жиноятчилар учун жазо автоматик тарзда енгиллаштирилишини танқид қилди.

«Ҳар қандай аёл, жиноят оғирми-енгилми — ҳаттоки одам ўлдирган бўлса ҳам — тўлиқ жазонинг учдан икки қисмини олади. Бу, аслида, жиноятга ундовчи «инсонийлик» эмасми?» — дейди Қодиров.

Унинг сўзларига кўра, партия бу моддани соҳа мутахассислари билан муҳокама қилиб, уни ўзгартириш бўйича расмий таклиф киритмоқчи. Шунингдек, Қодиров таълим тизимида ҳам муҳим ўзгаришлар кераклигини таъкидлади. У қуйидаги таклифларни илгари сурди:

• Тарбия ва таълим соҳасида ишловчи ходимлар учун пенсия ёшини 50 ёшгача тушириш;
• Пенсия ёшига етган шахсларнинг болалар билан бевосита ишлашини чеклаш;
• Таълим тизимидаги кадрларни янгилаш ва малакали ёш мутахассисларни жалб этиш.

Блогер Davletov.uz ўзининг Х даги саҳифасида Қодировнинг сўзларидан фарқли ўлароқ, йиллар ксимида аёллар ўртасидаги жиноятчилик борган сари камайиб бораётгани тўғрисидаги Миллий статистика агентлиги маълумотларини тақдим этди. Унга кўра, аёллар жинояти учун мавжуд енгиллаштирувчи моддаларга қарамай, Ўзбекистонда жами жиноятларнинг ўндан биридан сал кўпроғи аёллар томонидан содир этилади ва бу йиллар давомида камайиб бормоқда. Оғир жиноятлар, яъни одам ўлдирган ва унга уриниш (суиқасд) содир этган аёллар сони ҳам йилдан-йилга пасайи бормоқда. Хусусан, бу кўрсаткич 2012 йилда 83 тани ташкил қилган бўлса, 2024 йилга келиб 31 тагача пасайган. Аввалроқ тадбиркор Мурод Назаров «Тошкент шаҳрида дарахтларни кесишга чеклов бекор қилиниши керак»лиги ҳақида фикрига кенг жамоатчилик қаршилик билдирди. Бунинг фонида Алишер Қодиров «Дарахт кесилмасин, дегани мутлақо кесилмасин эмас, зарур бўлса кесилиши мумкин, дегани бўлиши керак», мазмунидаги фикрини оммага эълон қилди. Депутатнинг фикрича, жамиятда дарахт кесишдан қўрқув кучайиб бормоқда. Аслида кераксиз дарахтни кесишнинг ёмон жойи йўқ. «Дарахт кесилмасин, дегани мутлақо кесилмасин эмас, зарур бўлса кесилиши мумкин, дегани бўлиши керак. Албатта, дарахт керак, ҳаво етмаяпти, лекин унутмайлик, дарахтни инсон асраймиз, инсонни дарахт учун эмас. Бу кетишда келажак авлод динини унутиб, дарахтга этиқод қилишни бошлаб юбормаса… Дарахтни ҳимоясига бирлашгандек сув, ер, энергоресурслар, озиқ-овқат ва вақт, қолаверса ўзлигимизни исрофига қарши ҳам бирлаша олсак эди», — деб фикр билдирган у Telegram каналида. Шунингдек, Қодиров ишлаб чиқарилганига 25-30 йилдан ошган машиналарни истеъмолдан чиқаришга чақирди. Депутат, шунингдек, магистраль йўлларнинг аҳоли яшаш пунктидан ташқари қисмларида тезликни 130 km/h гача оширишга рухсат бериш масаласини кўриб чиқишни ҳам илгари сурди. Қодировга кўра, «ички ишлар тизимида вазирликдаги мансабдорнинг жияни ёки ҳамқишлоқлари эмас, ишини яхши биладиган қоракўзлар» ишлаши керак. Меҳриноза Фармонова тайёрлади.