Андижонда суюлтирилган газ таъминотида 550 млн сўмлик талон-торож аниқланди
Суюлтирилган газ таъминотида шаффофликни таъминлаш мақсадида, газ баллон етказиб берилганда қабул қилиб олган хонадон эгасини юзини идентификация қилиш орқали тасдиқлаш – Face ID тизими йўлга қўйилган эди.
© «Hududgaz Jizzah»Бош прокуратура ҳузуридаги Департаментнинг Андижон шаҳри бўлими томонидан ўтказилган терговга қадар текширувда «Андижоншаҳаргаз» газ таъминоти суюлтирилган газ бўлими масъул ходимлари қонунбузарликка йўл қўйгани фош этилди.
Маълумотларга кўра, улар 4 та маҳалла фуқаролар йиғини ҳудудида яшовчи аҳолига суюлтирилган газ етказиб берилгани ҳақида электрон дастурга сохта маълумотлар киритган.
Оқибатда, амалда етказиб берилмаган 550 млн сўмлик суюлтирилган газ талон-торож қилингани аниқланган. Ҳуқуқни муҳофаза қилувчи органлар бу ҳолатни давлат мулкини ўзлаштириш схемаси сифатида баҳоламоқда.
Жиноят иши
Мазкур ҳолат юзасидан Жиноят кодексининг 167-моддаси — ўзлаштириш ёки растрата йўли билан талон-торож қилиш ҳамда 228-моддаси — ҳужжат ва бланкаларни қалбакилаштириш билан жиноят иши қўзғатилди.
Ҳозирда иш бўйича тергов ҳаракатлари олиб борилмоқда. Тергов давомида ушбу схемага алоқадор бошқа шахслар ва етказилган зарарнинг аниқ миқдори ҳам ўрганилиши кутилмоқда.
Газ таъминоти статистикаси
«Hududgaztaʼminot» АЖ маълум қилишича, 2026-йил январ ойида 4,5 миллиондан ортиқ истеъмолчи табиий газ, 3,7 миллиондан зиёд аҳоли эса суюлтирилган газ билан таъминланган.
2025-йил мобайнида газ таъминоти сифатини яхшилаш мақсадида 28,9 минг дона қўшимча маиший газ баллони аҳолига тарқатилган.
