АҚШ 60 та давлатга, жумладан Қозоғистон ва Россияга янги импорт божларини киритди

АҚШ мажбурий меҳнат билан боғлиқ вазият сабабли 60 та савдо ҳамкорига, жумладан Қозоғистон, Россия ва Хитойга нисбатан янги импорт божларини жорий қилди. Бу ҳақда АҚШ Савдо вакили бошқармаси (USTR) эълон қилди.

Янги тарифлар 2026 йил 24 июлдан эътиборан кучга киради. Қарор 1974 йилдаги Савдо тўғрисидаги қонуннинг 301-моддасига мувофиқ қабул қилинган. Бунга мазкур давлатларнинг мажбурий меҳнат ёрдамида ишлаб чиқарилган товарлар импортини тақиқлашни жорий этиш ва самарали таъминлаш имконияти йўқлиги сабаб бўлган.

Тариф ставкалари ва асосий давлатлар

АҚШ Президентининг кўрсатмасига биноан, бож ставкалари давлатларнинг мажбурий меҳнатга қарши кўраётган чораларига қараб табақалаштирилди:

— Қозоғистон, Россия, Хитой ва Туркия каби текширув ўтказилган асосий давлатлардан импорт қилинадиган барча товарларга 12,5 фоизлик бож ставкаси қўлланилади.

— Мажбурий меҳнат импортини тақиқлаган ёки бу бўйича расмий мажбурият олган 17 та давлат, хусусан Ҳиндистон, Покистон ва Бангладеш учун 10 фоизлик ставка белгиланди.

— Европа Иттифоқи, Тайван, Япония, Жанубий Корея ва Швейцария учун уларнинг амалдаги савдо божларини (MFN) ҳисобга олган ҳолда махсус формула асосида 10 фоиз ёки 12,5 фоиз ставка жорий қилинди.

Тарифлардан озод қилиш учун ички таъминот тақчиллигини ёки иқтисодий узилишларни келтириб чиқариши мумкин бўлган қатор маҳсулотлар рўйхати тасдиқланди. Ушбу истиснолар рўйхатига айрим қишлоқ хўжалиги маҳсулотлари, кимёвий моддалар, тиббиёт воситалари, асбоб-ускуналар ва турли металлар киритилган.

Шунингдек, 2026 йил 24 июл соат 00:01 га қадар транзит йўлига чиққан ва 28 июлга қадар АҚШ ҳудудига кириб келган товарлар янги тарифлардан озод қилинади.