АҚШ Ҳўрмуз бўғозидан ўтиш учун кемалардан ҳақ ундириш қарорини бекор қилди

Америка Қўшма Штатлари Ҳўрмуз бўғози орқали ўтадиган кемалардан йиғим ундирмайдиган бўлди. Бунинг ўрнига Форс кўрфази давлатлари Вашингтон билан савдо ҳамда инвестиция битимларини тузади. Бу ҳақда Доналд Трамп ўзининг «Truth Social» ижтимоий тармоғидаги саҳифасида маълум қилди.

Трампнинг сўзларига кўра, Яқин Шарқ мамлакатлари етакчилари билан «самарали музокаралар» ўтказилган ва шундан сўнг йиғимларни бекор қилиш бўйича қарорга келинган.

АҚШ президенти мазкур инвестицияларнинг ҳажми жуда улкан бўлишини, шу билан бирга, бу уларнинг келажаги учун фавқулодда манфаатли эканини таъкидлади.

Шунингдек, Эрон портларига йўл олган ва у ердан қайтаётган, шунингдек, Эрон юкларини ташиётган кемалар учун Ҳўрмуз бўғозининг тўлиқ қамали ўзгаришсиз сақланиб қолади.

Олдинги қарор ва кема эгаларининг норозилиги

Эслатиб ўтамиз, 13 июл куни АҚШ Ҳўрмуз бўғозини ўз назоратига олиши ва кемаларнинг хавфсиз ўтишини таъминлагани учун ташилаётган юк қийматининг 20 фоизи миқдорида ҳақ ундиришини эълон қилган эди.
Америка президентининг бу ташаббусига йирик кема эгалари кескин қарши чиқди.

Хусусан, дунёдаги бешинчи йирик контейнер ташувчиси ҳисобланган Германиянинг «Hapag-Lloyd» компанияси Трампнинг юклар қийматидан 20 фоиз ушлаб қолиш ғоясини «тубдан нотўғри» деб атаган эди.