BBC директори Трамп нутқи видеоси атрофидаги можаро туфайли истеъфо берди
Тим Дэйви 2024 йилда Трамп нутқининг таҳрирланган версияси эфирга узатилгани бўйича танқидлардан сўнг Би-би-сидан кетишини эълон қилди.
Британиянинг Би-би-си (BBC) медиакорпорацияси бош директори Тим Дэйви истеъфога чиқди. Бу қарорга уни АҚШ президенти Доналд Трамп нутқининг таҳрирланган видеоси ортидан келиб чиққан можаро ундади. Мазкур материал BBCʼнинг «Panorama» дастурида 2024 йилдаги АҚШ президентлик сайловлари арафасида намойиш этилган.
Дэйвининг изоҳига кўра, корпорация сўнгги пайтларда бир қатор хатоларга йўл қўйган ва у раҳбар сифатида жавобгарликни зиммасига олишга қарор қилган. «Биз доимо очиқ, шаффоф ва ҳисобдор бўлишимиз керак», — дейилади унинг ҳамкасбларга йўллаган мактубида.
Можаро The Telegraph нашри BBC эфирида намойиш этилган видеолавҳада Доналд Трампнинг 2021 йил 6 январдаги нутқидан икки турли қисмнинг монтаж қилинганини фош қилганидан сўнг бошланган. Видеода Трампнинг гўё Капитолийни босиб олишга чақириқ қилгани ҳақида таҳрирланган гаплари берилган. Аммо таҳлилларга кўра, бу икки гап ҳақиқий нутқда бир-биридан қарийб соат фарқ билан айтилган бўлган.
Масала BBCʼнинг ички стандартлар бўйича маслаҳатчиси Майкл Прескотт тайёрлаган ёзма ҳужжатга асосланган. Ундаги маълумотларга кўра, эфирдаги монтаж тамошабинларда Трампнинг ғазабли ҳаракатларни қўллаб-қувватлагани тўғрисида нотўғри тасаввур уйғотган. Видео монтажида, шунингдек, чиқишдан аввал ёзилган намойишчилар кадрлари ҳам қўшилган.
Британия парламентидаги мухолифат вакиллари BBCʼдаги ушбу воқеа бўйича оммавий ишдан бўшатишларни талаб қилмоқда. Консерваторлар партияси етакчиси Кеми Баденок ушбу ҳолатни «сайловларга аралашиш» деб баҳолади.
