Citi биткоин нархи 2026 йилда 143 минг долларга етишини кутмоқда

Citi банки таҳлилчилари биткоин нархи бўйича янги прогнозни эълон қилди. Банкнинг базавий сценарийсига кўра, дунёдаги энг йирик криптовалюта 2026 йилда 143 минг долларгача қимматлаши мумкин. Бу 19 декабр ҳолатига кўра қайд этилган тахминан 88 минг долларлик нархдан 62 фоиздан ортиқ ўсишни англатади.

MarketWatchʼнинг хабар қилишича, Citi биткоин нархининг ўсишини, аввало, криптовалютага боғлиқ биржа фондларига (ETF) капитал оқими сақланиб қолиши билан изоҳламоқда. Банк таҳлилчилари ETFлар орқали қўшимча 15 млрд доллар сармоя кириб келиши биткоин қийматини қўллаб-қувватлашини таъкидлаган.

Оптимистик сценарийда Citi биткоин 189 минг доллардан ошиши мумкинлигини истисно қилмайди. Бу ҳолда криптовалюта жорий нархига нисбатан 114 фоизга қимматлайди. Шу билан бирга, пессимистик сценарий ҳам мавжуд: макроиқтисодий рецессия шароитида биткоин 78 500 доллар даражасигача тушиб кетиши мумкин.

Citi таҳлилчилари прогнозга ижобий таъсир кўрсатиши мумкин бўлган яна бир омилга эътибор қаратмоқда. АҚШ Конгрессида криптовалюталарни тартибга солишга қаратилган Clarity Act қонуни муҳокама қилинмоқда. Агар ушбу ҳужжат қабул қилинса, биткоин АҚШда товар фючерслари савдосини назорат қилувчи орган ваколатига ўтади. Бу эса институционал инвесторлар учун қўшимча аниқлик ва ишонч яратиши мумкин.

Ethereum бўйича Citi анча эҳтиёткор позицияни эгалламоқда. Банк фикрича, ETH иқтисодий фаолликка кўпроқ боғлиқ бўлиб, унинг қўлланиш доираси кенгаймагани ўсиш салоҳиятини чеклаб қўймоқда.

Айни пайтда биткоин октябр ойида қайд этилган рекорд даражадан қарийб 30 фоиз паст савдоланмоқда. Шунингдек, у 2025 йил бошидаги нархидан ҳам тахминан 7 фоиз арзон. Бироқ ETF бозоридаги кескин маблағ чиқишлари сўнгги пайтда барқарорлашгани бозор учун муҳим сигнал сифатида баҳоланмоқда.