Eng yaxshi mikrokredit va avtokredit stavkalarini qaysi banklar taklif qilmoqda?

Markaziy bank 2026-yil 6-iyul holatiga ko‘ra, mamlakatdagi tijorat banklari tomonidan aholiga ajratilgan mikroqarz va avtokreditlar bo‘yicha o‘rtacha foiz stavkalarini e’lon qildi.

Yangi haftada avtokreditlar bo‘yicha o‘rtacha foiz stavkasi 21,5 foizni, mikroqarzlar bo‘yicha esa 29,1 foizni tashkil qildi. O‘tgan haftada bu ko‘rsatkich mos ravishda 21,6 va 28,9 foiz bo‘lgandi.

Mikroqarzlar

Mikroqarzlar segmentida eng past foiz stavkasi 22,8 foiz bilan «Aloqabank»da qayd etildi. Keyingi o‘rinlarda «Infinbank» 24 foiz, «Asia Alliance Bank» 24,1 foiz, «Trastbank» 24,5 foiz va «Milliy bank» 25,1 foiz stavka bilan joylashdi.

Shuningdek, «OFB» 26 foiz, «BRB» 26,5 foiz, «Xalq banki» va «Agrobank» 26,6 foizdan, «Mikrokreditbank» 26,7 foiz, «Asaka bank» 26,9 foiz, «SQB» 27,2 foiz, «Poytaxt bank» 27,3 foiz hamda «Turon bank» 27,5 foiz stavkada mikroqarz taklif qilmoqda.

Yuqori segmentda «Garant bank» 29,1 foiz, «Hamkorbank» 30,2 foiz, «Universal bank» 30,4 foiz, «Apex bank» 30,8 foiz, «Madad Invest bank» 31,7 foiz va «TBC bank» 33,4 foiz stavka taklif qilmoqda.

Eng yuqori stavkalar «Ipoteka bank» 33,8 foiz, «Ipak Yo‘li banki» 34,2 foiz, «Davr bank» 34,6 foiz, «Uzum bank» 38 foiz, «AVO bank» 39,9 foiz, «Anor bank» 41,1 foiz va «Tenge bank» 42,5 foizda qayd etildi.

^{Manba: Markaziy bank}

Avtokreditlar

Avtokreditlar bo‘yicha eng past stavka 18,3 foiz bilan «BRB»da qayd etildi. Keyingi o‘rinlarda «Apex bank» 20,9 foiz, «Octobank» 21 foiz, «SQB» 21,4 foiz va «Davr bank» 21,5 foiz stavka bilan joylashdi.

Shuningdek, «Ipak Yo‘li banki» 22 foiz, «Aloqabank» 22,3 foiz, «OFB» 22,4 foiz, «Garant bank» va «Asaka bank» 22,5 foizdan, «Turon bank» 22,7 foiz hamda «Ipoteka bank» 23,1 foiz stavkada avtokredit ajratmoqda.

O‘rta segmentda «Xalq banki» 23,5 foiz, «Asia Alliance Bank» 23,6 foiz, «Milliy bank» 23,7 foiz, «Mikrokreditbank» 24,1 foiz, «Trastbank» 24,5 foiz stavka taklif qilmoqda.

Banklar orasida eng yuqori avtokredit stavkalari «Hamkorbank» 25,2 foiz va «Agrobank» 25,3 foizda qayd etildi.

^{Manba:markaziy bank}

Ma’lumot uchun, yil boshidan beri aholiga berilgan kreditlar qoldig‘i 3,1 foizga ko‘payib, 227,1 trln so‘mga yetgan. Bunda avtokreditlardan boshqa barcha kreditlarda o‘sish kuzatilgan. Banklardagi aholining avtokreditlari qoldig‘i 1-yanvarga nisbatan 0,4 foizga pasayib, 39,56 trln so‘mgacha tushgan.

Banklarda avtokredit ajratish 2023 yildan keyin kamayishni boshladi. Bunga Markaziy bank tomonidan kiritilgan cheklovlar sabab bo‘ldi.  Regulyator risklarni oldini olish maqsadida banklarning kredit portfeliga avtokreditlar uchun 25 foizlik cheklov joriy qilgandi. 

Natijada avtokredit ajratish pasayishni boshladi va bu ikkilamchi bozordagi avtomobil narxlariga ham ta’sir qildi — 17-18 ming dollar sotilgan Cobalt narxlari bozorda 10-11 ming dollargacha tushib ketdi.  2023 yilda aholi uchun eng ommabop kredit avtokredit bo‘lgan bo‘lsa, 2025 yilga kelib ularning o‘rnini mikroqarzlar egalladi. 

Biroq, yaqin yillarda mikroqarzlar uchun banklarning kredit portfeliga 25 foizlik cheklov joriy qilinishi kutilyapti.  Shu sababli yangi tartibga banklar allaqachon moslashishni boshlab yuborgan. Bu bir tomondan mikroqarzlar foizini pasaytirayotgan bo‘lsa, boshqa tomondan ularni olish imkoniyatini qiyinlashtirmoqda.