Франция «Grinch»ни ҳибсга олди
Францияда Россиянинг «соя флот»и билан боғлиқ бўлиши мумкин деб гумон қилинаётган «Grinch» нефт танкерига нисбатан маъмурий ҳибс жорий этилди. Олдинроқ ҳибсга олинган кема капитани озод қилинди ва кемага қайтди.
Кеча, 28 январ куни Франция ҳукумати Россиянинг «соя флот»ига алоқадор бўлиши мумкин деган гумон билан ушлаб қолинган «Grinch» нефт танкерига нисбатан маъмурий ҳибс чорасини қўллади. Бу ҳақда Марсел прокуратураси баёнотига таяниб, «Reuters» агентлиги хабар берди.
58 ёшли Ҳиндистон фуқароси бўлган танкер капитани аввалроқ Франция томонидан ҳибсга олинган эди, кейинчалик у озод қилиниб, кемага қайтган.
Франциянинг «BFMTV» телеканали хабар беришича, танкер Мурманскдан Комор ороллари байроғи остида (сохта байроқ билан) йўлга чиққан. Ушлаб қолинганидан сўнг кема Марсел–Фос портига йўналтирилган. «BFMTV» шунингдек, «Grinch» Буюк Британиянинг санкциялар рўйхатига киритилганини, Европа Иттифоқи ва АҚШ санкциялари остида эканини таъкидлайди. Бироқ у мазкур «қора рўйхат»ларда бошқа номлар билан қайд этилган. Кема асосан нефт маҳсулотларини Хитой ва Ҳиндистонга экспорт қилиш билан шуғулланади.
«Grinch» танкерининг ушланиши ва Россиянинг «соя флот»и
22 январ куни Ўртаер денгизида «Grinch» танкери ушлаб қолинганидан сўнг Франция президенти Эмманюэл Макрон операция ўтказишда Францияни бир қатор иттифоқчилар, жумладан Буюк Британия ҳам қўллаб-қувватлаганини маълум қилди. У, шунингдек, кема халқаро санкциялар остида эканини ва эҳтимол, сохта байроқ остида ҳаракатланганини қайд этди.
Россиянинг «соя флот»и, асосан, ғарб давлатларининг суғурта ва рўйхатдан ўтказиш тизимларидан ташқарида фойдаланилаётган эски кемалардан иборат. Улар орқали Россиянинг Украинага қарши кенг кўламли босқинидан сўнг Европа Иттифоқи томонидан жорий этилган санкцияларни четлаб ўтади. Нефт савдосидан олинаётган даромадлар, жумладан Ҳиндистон ва Хитой каби давлатларга арзон нархларда сотиш орқали топилган маблағлар, урушни молиялаштиришга йўналтирилмоқда.
