Истанбул россиялик сайёҳлар бўлган кемани портга киритмади
«Astoria Grande» кемасига Истанбулда тўхташга рухсат берилмади. Кема кутишдан сўнг Сочига қайтишга мажбур бўлган.
Туркиянинг Истанбул порти Россия саёҳатчилари бор «Astoria Grande» круиз кемасини киритмади. РИА «Новости» агентлигининг кема вакилига таяниб хабар қилишича, у 20 ноябр куни эрталабдан соат 15:00 гача портга қўйишга рухсат кутган, аммо рухсат берилмаганидан кейин круизнинг якуний манзили — Сочи шаҳрига йўл олган.
Маълумотларга кўра, бундай ҳолат биринчи марта кузатилмоқда. Илгари Палау байроғи остида ҳаракатланувчи «Astoria Grande» кемаси бир неча бор Туркиянинг Истанбул портига кира олган. Круизни ташкил этувчи «СК Аквилон» компанияси порт маъмуриятининг қарорини тушунтиришмаганини билдирган.
Туркиянинг «Anadolu» агентлиги маълумотига кўра, бортида 616 нафар йўловчи, асосан россиялик сайёҳлар, шунингдек экипаж аъзолари бўлган. Круиз дастури доирасида кема Анталия, Алания ва Измир портларига муваффақиятли ташриф буюрган. Шунга қарамай, Истанбулда кутилмаган тўхтатилиш улар учун ноқулайликлар келтириб чиқарди.
Круизлар жадвалининг ўзгариши кутилмаяпти. «СК Аквилон» компанияси «Astoria Grande»нинг кейинги саёҳатлари режага мувофиқ амалга оширилишини маълум қилди. Ҳозирча портнинг нега бундай қарор қабул қилгани ҳақида Туркия расмий органлари томонидан расмий изоҳ берилмаган.
