Мексикада «Z авлод» намойиши тартибсизликка айланиб кетди
Мехико марказида ўтказилган норозилик намойишида тартибсизликлар юз берди: 100 дан ортиқ полициячи ва 20 нафар фуқаро жароҳатланди, бир неча намойишчи ҳибсга олинди.
Мехико шаҳрида минглаб одамлар «Z авлод» номи остида ҳукуматнинг хавфсизлик сиёсатига қарши намойишга чиқди. Намойишларга Уруапан шаҳри мэри Карлос Манзонинг оммавий тадбирда отиб ўлдирилиши туртки бўлди. Reuters ёзишича, норозилик акциялари Мексиканинг кўплаб шаҳарларида ҳам ўтказилган.
Мехико шаҳар жамоат хавфсизлиги вазири Пабло Васкес Камачонинг маълум қилишича, тартибсизликлар пайтида 114 нафар полициячи жароҳат олган, улардан 40 нафари шифохонага ётқизилган. Шунингдек, 20 нафар тинч аҳоли вакили ҳам жароҳатланган.
Президент Клаудия Шейнбаум яшайдиган Миллий сарой ёнида бир гуруҳ ниқобли намойишчилар тўсиқларни бузиб киришга уриниб, полиция билан тўқнашув юз берди. Махсус кучлар кўз ёш оқартувчи газ ишлатган. Воқеа гувоҳларининг Reuters’га билдиришича, вазият кескинлашган.
Камачо 20 киши ҳибсга олинганини, яна 20 нафар фуқарога маъмурий ҳуқуқбузарлик учун судга чақирув берилганини маълум қилди.
Маълумот учун: «Z авлоди» деб 1997–2012 йиллар оралиғида туғилган ёшлар аталади.
Эслатиб ўтамиз, сентябр ойида Непалда Интернетнинг чекланиши ортидан келиб чиққан оммавий тартибсизликлар натижасида ҳукумат ағдарилган эди. Бу намойишлар тарихга Z авлод қўзғалони номи билан кирди.
