«Мен — кетиб бораётган инсонман»: Лукашенко ҳокимиятни «кўкариб кетган бармоқлар» билан ушлаб турмаётганини айтди

Беларус президенти Александр Лукашенко яна бир бор ҳокимиятни «кўкариб кетган бармоқлар» билан ушлаб турмаётганини билдирди.

«Амалдаги президент, мен тез-тез айтганимдек, ҳокимиятни кўкариб кетган бармоқлар билан ушлаб турмаяпти», — деди Лукашенко мамлакат Бош прокуратураси ва Тергов қўмитасига янги раҳбарларни тайинлаш чоғида. Беларус етакчисининг сўзларидан БелТА агентлиги иқтибос келтирди.

Лукашенко мавжуд давлат тузумига қарши «инқилобий» кураш томон қадамлар бўлмаслиги кераклигини таъкидлади, ҳокимиятни алмаштириш учун сайловлар мавжудлигини билдирди.

«Мавжуд давлат тузумига қарши «инқилобий» кураш режалари йўқ. Бунинг учун сайловлар бор. Сайловларга бориш ва бу муаммоларни ҳал қилиш керак. Беларусда бу борада барча имкониятлар бор», - деди Лукашенко.

«Мен — кетиб бораётган инсонман. Гарчи кўплар бунга ёпишиб олган бўлса-да: Ҳмм, кетиб бораётган!.. Кимдир хавотирда, кимдир хурсанд. Бу эса эртага ҳаммамиз бу ишларни ташлаб, мен ҳам жумладан, кетиб қоламиз дегани эмас. Аммо тушунарлики, мен энди президент сифатида биринчи ёки иккинчи йил ишлаётган одам эмасман», - деди давлат раҳбари. «Бу шуни англатадики, мен халқимизнинг ҳуқуқ ва манфаатларини муқаддас тарзда ҳимоя қиламан. Сизлар ҳам шу йўналишда ишлашингиз керак», - дея қўшимча қилди Лукашенко.

Лукашенко 1994 йилда илк бор Беларус президенти этиб сайланган, шундан бери бир неча бор қайта сайланган ва мамлакатни аллақачон еттинчи президентлик муддати давомида бошқариб келмоқда. У 2019 йил охирида президентлик креслосини «кўкариб кетган бармоқлар» билан ушлаб турмаётганини айтган ва кейинчалик бу фикрни бир неча бор такрорлаган. Шунингдек, у ўзини «кетиб бораётган» президент деб атаган. Жумладан, 18 декабр куни Бутун Беларус халқ йиғини мажлисида Лукашенко ўзини кетиб бораётган президент деб атаб, мавжуд муаммоларни ҳал этишни ният қилганини ва уларни янги авлод зиммасига юклашни истамаслигини айтган.

Бу йил август ойида Американинг Time нашрига берган интервюсида Лукашенко ҳозирча навбатдаги президентлик муддатига номзодини қўйишни режалаштирмаётганини билдирган. Шу билан бирга, янги президентлик муддати эҳтимоли ва соғлиғи ҳақида гапирар экан, АҚШ президенти Доналд Трампдан ҳам бақувват бўлишга ҳаракат қилишини айтган. Яқинда ўтган ВХЖ мажлисида келгуси президентлик сайловлари ҳақидаги саволга жавоб бериб, Беларусь раҳбари бўлажак сайловлар вақтигача соғлом бўлишини кафолатлашини, аммо уларда иштирок этишини кафолатламаслигини билдирган. Беларусь президенти сайловлари 2030 йил 20 январидан кечиктирмасдан ўтказилиши керак.