Озарбойжонда СССР байроғи остида коммунистик юриш ташкил этганлар ҳибсга олинди

Озарбойжонда коммунистик идеологияни тарғиб қилиш мақсадида СССР байроқлари билан ноқонуний юриш уюштирмоқчи бўлган гуруҳ аъзолари Боку ҳуқуқ-тартибот идоралари томонидан қўлга олиниб, уларга нисбатан жиноий иш қўзғатилди.

Суд маълумотларига кўра, ушбу иш доирасида Абдулла Иброҳимли ва Иброҳим Асадлига бўлган дастлабки текширув ишлари якунига етди ва ҳар иккисига 3 ойлик қамоқ эҳтиёт чораси қўлланган.

Суд айбловларни жамоат тартибини бузишга йўналтирилган ҳаракатларни ташкиллаштириш билан боғлиқ жиноят моддалари асосида белгилаган. Тергов маълумотларига кўра, улар ижтимоий тармоқларда коммунистик ғояларни тарғиб қилган ва пойтахт кўчаларида рухсатсиз марш уюштиришга уринган.

Ҳибсга олинганлар узоқ вақт давомида ижтимоий тармоқларда фаол бўлгани, марксист ва коммунистик ғояларни ёйиш билан шуғуллангани таъкидланмоқда. Терговга кўра, гуруҳ махсус ижарага олинган офисда ташкил этилган йиғинлар орқали фаолият юритган ва уларнинг фаолияти хориждаги манфаатдор доиралар томонидан қўллаб-қувватлангани гумон қилинмоқда.

Қўлга олинган Иброҳим Асадли врач-онколог экани, унинг иш жойидан Ленин бюсти, Че Гевара портретлари ва бошқа коммунистик атрибутика топилгани расман тасдиқланди. Асадлининг ҳуқуқ-тартибот идоралари эътиборига илгари ҳам тушгани, у шифохонада ишлаган, турмуш ўртоғига нисбатан зўравонликда айблангани ҳақида ҳам маълумот берилган. Бундан ташқари, у рак касаллигига нисбатан алтернатив даволаш усуллари ҳақидаги баҳсли баёнотлари билан ҳам жамоатчилик диққатини тортган.

Полиция томонидан ўтказилган тинтувлар чоғида офис ва уй-жойлардан коммунистик ғояларни тарғиб этувчи китоблар, байроқлар, CD-дисклар, радикал тарғибот материаллари ва электрон носирлар мусодара қилинди. Тергов ишлари ҳозир ҳам давом этмоқда ва айбланувчиларнинг фаолияти ёки унинг ортида турган эҳтимолий гуруҳлар ҳақида қўшимча маълумотлар аниқланмоқда.