Ўзбекистонда аграр соҳа учун янги компенсация ва субсидиялар эълон қилинди
2026-йил ҳосилидан бошлаб пахта ва буғдой етиштирувчиларни молиявий қўллаб-қувватлашнинг янги механизми жорий этилади. Шунингдек, дизел ёқилғиси учун ҳам субсидия ажратилади.
© Javhar ChorshanbiyevaЭнди Ўзбекистонда пахта ва буғдой етиштирувчилар молиявий қўллаб-қувватланади. Бу 8-май куни қабул қилинган «Пахта ва буғдой етиштирувчиларни молиявий қўллаб-қувватлашнинг қўшимча чора-тадбирлари тўғрисида»ги президент фармонида белгиланган.
Фармонга кўра, 2026-йил ҳосилидан бошлаб Қишлоқ хўжалиги вазирлиги ҳузуридаги Аграр соҳада тўловлар агентлиги томонидан пахта хомашёсини етиштириш учун ажратилган имтиёзли кредитларни шартномада белгиланган муддатда қайтарган хўжаликларга ушбу кредитлар бўйича тўланган фоизнинг 2,5 фоизлик пункти, ҳосил йилининг якунига (31-декабрига) қадар қайтарган хўжаликларга кредитлар бўйича тўланган фоиз тўловларининг 5 фоизлик пункти компенсация қилинади.
Шунингдек, буғдой етиштириш харажатлари учун ажратилган имтиёзли кредитларни ҳосил йилининг 1 августига қадар тўлиқ қайтарган хўжаликларга ушбу кредитлар бўйича тўланган фоиз тўловининг 4 фоизлик пункти ҳамда пахта хомашёсини харид қилиш учун пахта-тўқимачилик кластерлари ҳамда пахта хомашёсини қайта ишлаш ва ип-калава ишлаб чиқариш занжирига эга тўқимачилик корхоналарига ажратилган тижорат кредитлари бўйича тўланган фоиз тўловининг 8 фоиз пунктидан юқори, лекин 16 фоиз пунктдан ошмаган қисми компенсация қилинади.
Айрим қишлоқ хўжалиги корхоналарига субсидия ажратилади
Фармонга кўра, дизел ёқилғисини харид қилиш билан боғлиқ харажатларни қисман қоплаш мақсадида 2026-йил 1-апрелдан 2026-йил 1-июльгача қишлоқ хўжалиги корхоналари томонидан биржа орқали харид қилинган ҳар бир тонна дизел ёқилғиси қийматининг 13 млн сўмдан ошган қисми учун, бироқ 2 млн сўмдан кўп бўлмаган миқдорда республика бюджети ҳисобидан Аграр соҳада тўловлар агентлиги орқали субсидия ажратилади.
2026-йил 1-сентябрдан Қишлоқ хўжалигини давлат томонидан қўллаб-қувватлаш жамғармасининг хўжаликларга қуйидаги субсидияларни ажратиш ваколати Аграр соҳада тўловлар агентлигига ўтказилади:
*қишлоқ хўжалиги субъектларига ўз маблағлари ҳамда тижорат банклари кредитлари ҳисобидан етиштирилган пахта хомашёсини биржада сотганда расмийлаштирилган электрон ҳисобварақ-фактура қийматининг бир қисмини қоплаб бериш;
*пахта-тўқимачилик кластерлари ҳамда ип-калава ишлаб чиқариш занжирига эга тўқимачилик корхоналарига ўз маблағлари ҳисобидан харид қилинган пахта хомашёси қийматининг бир қисмини қоплаб бериш.
