Ўзбекистонда исломий банк фаолиятини жорий этиш бўйича қонун лойиҳаси қабул қилинди
Депутатлар исломий банк хизматларини амалга оширишни ҳуқуқий жиҳатдан тартибга солувчи қонун лойиҳасини иккинчи ўқишда маъқуллаб, Сенатга юборди.
Олий Мажлис Қонунчилик палатасида Ўзбекистонда исломий банк фаолиятини йўлга қўйишга қаратилган қонун лойиҳаси иккинчи ўқишда кўриб чиқилди. Бу ҳақда Олий Мажлис Қонунчилик палатаси матбуот хизмати хабар берди.
Маълумотларга кўра, сўнгги йилларда мамлакатда банк тизимини модернизация қилиш ва халқаро тажрибаларни жорий этиш бўйича кенг кўламли ишлар амалга оширилмоқда. Шу билан бирга, молия хизматлари қамровини кенгайтириш ҳамда янги турдаги банк амалиётларини йўлга қўйиш зарурати юзага келган.
Қонун лойиҳаси билан Ўзбекистон Республикасининг айрим қонун ҳужжатларига исломий банк фаолиятини амалга оширишнинг ҳуқуқий асосларини белгилайдиган қўшимча ва ўзгартишлар киритилмоқда. Лойиҳа муҳокамаси давомида депутатлар исломий банк ва молия операцияларига оид ҳуқуқий нормаларни лойиҳада тўлиқ акс эттирилганини қайд этишди. Шунингдек, молия стандартлари ва инвестициявий депозитлар бўйича аввал берилган таклифлар инобатга олингани таъкидланди.
Ҳужжатда исломий банк фаолияти учун лицензия олиш тартиби аниқ белгилаб берилган. Шунингдек, исломий молия операцияларига оид асосий тушунчалар очиб берилган бўлиб, бундай банкларга исломий молия стандартлари асосида мижозларни молиялаштириш учун савдо фаолияти билан шуғулланиш, юридик шахслар ташкил этиш ҳамда уларнинг устав капиталида иштирок этиш ҳуқуқи берилади.
Депутатлар таъкидлашича, қонун лойиҳасида исломий молия операцияларига солиқ солиш тартибининг жорий этилиши молиявий хизматлар қамровини кенгайтириб, янги инвестициявий имкониятлар яратишга хизмат қилади.
Қонуннинг қабул қилиниши мамлакатда исломий банк тизимини босқичма-босқич жорий этишга, яширин иқтисодиёт улушини қисқартиришга ҳамда хорижий инвестицияларни жалб қилишга хизмат қилиши кутилмоқда.
Қонун лойиҳаси депутатлар томонидан қабул қилинди ва кўриб чиқиш учун Сенатга юборилди.
Эслатиб ўтамиз, Vaqt.uz Ўзбекистонда исломий банк фаолиятини жорий қилиш ташаббусининг асосий мақсад ва чекловларини, лицензия масаласидаги янгиликларни, шунингдек 2018 йилдан буён давом этаётган жараёнларни ҳамда ўзбекистонликларнинг бу хизматларга қай даражада эҳтиёжи борлигини таҳлил қилган эди.
