Ўзбекистонда коррупция энг кўп учрайдиган соҳалар маълум бўлди

Ўзбекистонда ўтган йили коррупция билан боғлиқ жиноятларнинг энг кўпи мактабгача ва мактаб таълими, соғлиқни сақлаш, маҳаллий ҳокимликлар ҳамда тижорат банклари ҳиссасига тўғри келган. Бу ҳақда 8-август куни бўлиб ўтган Сенатнинг 18-ялпи мажлисида айтилди.

2025-йилда коррупцияга оид жиноятлар бўйича 7517 киши жиноий жавобгарликка тортилган, давлат манфаатларига 2,9 трлн сўмдан ортиқ зарар етказилган.

Шунингдек, норматив-ҳуқуқий ҳужжатлар лойиҳаларининг ҳар тўртинчисида коррупциявий омиллар аниқланган, давлат харидлари соҳасида 12,6 трлн сўмлик қонунбузилишлар қайд этилган, айрим давлат органлари ва ҳудудлар коррупцияга қарши курашиш самарадорлиги ҳамда очиқлик индекси бўйича қониқарсиз натижа кўрсатган.

Сенаторлар коррупцияга қарши курашишда эришилган натижалар билан бир қаторда, профилактика ишларининг самарадорлигини ошириш, давлат харидлари соҳасида қонунийликни мустаҳкамлаш, ички назорат (комплаенс) тизими фаолиятини кучайтириш, давлат органлари фаолиятининг очиқлигини таъминлаш ҳамда коррупция оқибатида давлатга етказилган зарарнинг қопланиши устидан назоратни кучайтириш зарурлигини таъкидлади.

Жорий йилнинг бошида «Transparency International» халқаро нодавлат-нотижорат ташкилоти 2025-йил якунлари бўйича ўзининг анъанавий Коррупцияни қабул қилиш индексини эълон қилганди. Ўзбекистон унда 31 балл билан 182 та давлат ичида 124-ўринни олганди. Ташкилотга кўра, Ўзбекистонда расмий ислоҳотлар баъзи ютуқларни берган, аммо коррупцияни очиб берадиган журналистлар ва блогерлар ҳануз таъқиб ёки судга тортилиш хавфи билан юзлашмоқда, бу эса коррупцияга қарши курашнинг самарадорлигини чеклаб қўймоқда.

Эслатиб ўтамиз, аввалроқ сув хўжалигидаги коррупция давлатга 70 млрд сўмдан зиёд зарар етказганди.