Ўзбекистонда ем-хашак ва ёғли маҳсулотлар етиштиришга имтиёзли кредитлар ажратилади

Ўзбекистонда чорвачиликни қўллаб-қувватлаш ва аҳолини озиқ-овқат билан таъминлаш бўйича янги чора-тадбирлар белгиланди. Президент қарорининг асосий мақсади — маҳаллий маҳсулот етиштиришни ошириш ва соҳа иштирокчиларига молиявий енгилликлар яратишдир.

Фермерлар ем-хашак ва ёғли экинлар етиштириш учун 12 ой муддатга 12 фоиз йиллик ставкага имтиёзли кредит олиш имконига эга бўлади. Кредит миқдори бўлажак ҳосил қийматининг 50 фоизигача бўлиши мумкин. Маблағлар Қишлоқ хўжалигини давлат томонидан қўллаб-қувватлаш жамғармаси орқали ажратилади. Кредит қайтарилмаслик хавфини суғурта қилувчи полис ёки қонун доирасидаги бошқа кафолатлар гаров сифатида қабул қилинади.

2026 йил бошидан насосларда сув поливи учун ишлатиладиган электр энергия харажатларининг 50 фоизи давлат томонидан қоплаб берилади. Бу йўналишда ҳам ем-хашак, ҳам ёғли экинлар етиштирувчилар қўллаб-қувватланади.

Бундан ташқари, Касб-ҳунарни ривожлантириш компанияси (КҲРК) чорвачилик, паррандачилик ва балиқчилик, шунингдек, озуқа тайёрлаш, пахта ва жунни қайта ишлаш лойиҳалари учун ажратилган кредитларнинг фоиз қисмини субсидиялайди. Аниқланишича:

Айланма маблағни тўлдириш, ҳайвон ва уруғ хариди, хомашё етиштириш учун олинган кредитларда 3 млрд сўмгача бўлган қисм;

Лойиҳаларни кенгайтириш, техника хариди, парранда ва балиқ фермалари ташкил этиш, жун қайта ишлаш учун эса 5 млрд сўмгача бўлган қисм субсидияланади.

Миллий валютадаги кредитлар бўйича Касб-ҳунарни ривожлантириш компанияси томонидан Марказий банк асосий ставкаси устидан 4 фоизидан 10 фоизигача бўлган фарқ қоплаб берилади. Валютадаги қарзлар учун эса 8 фоиз устидан 4 фоизгача бўлган фарқ давлат томонидан қопланади.

Шунингдек, КҲРК кредитлар учун 50 фоизгача кафиллик тақдим этади. Бир лойиҳа учун максимал кафолат ҳажми 10 млрд сўмни ташкил этади.