Ўзбекистонда йилига 125 миллион куб метр газни тежаш режалаштирилмоқда

Ўзбекистонда йил бошидан буён бешта янги газ кони очилди, шунингдек, ҳудудларда 6000 метргача ва ундан ортиқ чуқурликларга 80 та қудуқ бурғиланди. Бу ҳақда 5 октябрь куни Президент Шавкат Мирзиёевга нефть ва газ тармоғида амалга оширилаётган йирик лойиҳалар юзасидан берилган тақдимотда маълум қилинди.

Тақдимотда жорий йилда «Ўзбекнефтгаз» АЖ фаолиятини такомиллаштиришга қаратилган иккита қарор ижроси ҳамда табиий газ қазиб чиқариш кўрсаткичлари таҳлил қилинган. Маълум қилинишича, йилнинг тўртинчи чорагида яна 40 та қудуқни бурғилаш режалаштирилган.

Истиқболли майдонларни, хусусан, Устюртнинг катта чуқурликдаги қатламларини ўрганиш, янги конларни ўзлаштириш мақсадида хорижий ҳамкорлар билан биргаликда янги қудуқларни бурғилаш лойиҳалари амалга оширилмоқда.

«Ўзбекнефтгаз»нинг молиявий ҳолати ва газ тежаш дастури

Тадбирда «Ўзбекнефтгаз» АЖ ва унинг тасарруфидаги йирик корхоналарнинг молиявий кўрсаткичлари ҳам кўриб чиқилди. Жорий йилнинг тўққиз ойи якунларига кўра, корхоналарнинг жамланган соф фойдаси ўтган йилнинг мос даврига нисбатан ўсган. Кредит портфелини мақбуллаштириш орқали қарздорлик камайтирилиб, юқори фоизли кредитлар шартларини қайта кўриб чиқиш натижасида фоиз харажатларини тежашга эришилган.

Шунингдек, тақдимот доирасида газ транспорт тизимининг ўтказувчанлик қувватини ошириш масалалари муҳокама қилинди. Бу йўналишда янги магистрал газ қувурларини қуриш ва компрессор станцияларини модернизация қилиш кўзда тутилган. Мазкур лойиҳаларнинг амалга оширилиши ҳамда айрим станцияларда замонавий электр двигателларини ишга тушириш орқали йилига 125 миллион куб метр газ тежаш имкони яратилади.

Давлат раҳбари геология-қидирув ва бурғилаш ишлари натижадорлигини ошириш ҳамда тармоқ корхоналари фаолиятида самарадорликка алоҳида эътибор қаратиш юзасидан масъулларга тегишли кўрсатмалар берди.