Ўзгидромет қор кўчиши хавфидан огоҳлантирди
Тошкент вилоятининг тоғли ҳудудларида қор кўчиши хавфи эълон қилинди. Бу хавф асосан Бўстонлиқ, Оҳангарон ва Паркент туманларига тааллуқли.
5–7 ноябр кунлари ҳаво ҳароратининг кескин ўзгариши натижасида Чотқол тизмаси тоғларида, айниқса 2000 метрдан баланд ҳудудларда қор кўчиши хавфи мавжуд. Бу ҳақда Ўзгидромет огоҳлантирди.
«Тоғли ҳудудларда истиқомат қилувчи фуқаролар, дам олувчилар ҳамда тоғли йўлларда ҳаракатланувчи ҳайдовчилардан эҳтиёт чораларини кўришларини сўраймиз», — дейилади Ўзгидромет тезкор ахборотида.
Маълум қилинишича, 5–6 ноябр кунлари мамлакат бўйлаб совуқ ва нам ҳаво массалари кириб келиши натижасида об-ҳаво кескин ўзгаради. Ҳарорат тунда 0…+3 даража илиқ атрофида бўлиб, айрим ҳудудларда совуқ тушиши мумкин. Кундуз кунлари эса ҳаво +5…+10 даража илиқ бўлиши кутилмоқда.
Бўстонлиқ, Оҳангарон ва Паркент тоғли ҳудудларидаги дам олиш зоналари ва йўлларда, айниқса, 2000 метрдан юқори баландликлардаги фуқаролар учун бу даврда эҳтиёт чоралари алоҳида аҳамиятга эга.
