«Ўзсаноатқурилишбанк» сўнгги 3 ойда қанча фойда олди?

«Ўзсаноатқурилишбанк» 2026 йилнинг биринчи чораги якунлари бўйича молиявий ҳисоботини эълон қилди. Унга кўра, банкнинг соф фойдаси 550 млрд сўмни ташкил этган.

Бу кўрсаткич ўтган йилнинг шу даврига нисбатан 146,1 млрд сўмга ёки 36,2 фоизга кўпдир. 2025 йилнинг мос даврида банк 404 млрд сўм соф фойда олган эди. Ҳисобот Ягона корпоратив ахборот порталида тақдим этилди.

Банк активлари

Банк активлари 104,45 трлн сўмга етган ва йил бошига нисбатан 2 трлн сўмга ёки 2 фоизга ошган.

Активлар таркибида энг катта улушни кредит ва лизинг операциялари ташкил қилди. Уларнинг ҳажми 60,7 трлн сўмга тенг бўлиб, жами активларнинг 58,1 фоизини қамраб олган. Шу билан бирга, эҳтимолий зарарларни қоплаш учун 2,66 трлн сўмлик захира ажратилган.

Банкнинг қимматли қоғозларга йўналтирилган маблағлари 12,9 трлн сўмни ташкил этган бўлса, бошқа молиявий ташкилотлардан олиниши лозим бўлган маблағлар 11,45 трлн сўмга тенг бўлган. Шунингдек, кредит ҳисобларида сотиб олинган активлар қиймати 1,53 трлн сўмни ташкил этган.

Даромадлар

Даромадлар қисмида фоизли тушумлар 2,72 трлн сўмни, фоизсиз даромадлар эса 3,62 трлн сўмни ташкил этган. Харажатлар эса мос равишда 1,95 трлн сўм ва 540,6 млрд сўмни ташкил этди.

Ҳисобот даврида банк ходимларига 266,2 млрд сўм иш ҳақи тўланган. Бу жами операцион харажатларнинг 48,4 фоизига тенг бўлган. Шунингдек, фойда солиғи 82,9 млрд сўмни ташкил этган.

Эслатиб ўтамиз, 2025 йил 1 декабр ҳолатига кўра, Ўзбекистондаги банклар 11 ой ичида 13,5 трлн сўм соф фойда олган. Бу ўтган йилнинг мос даврига нисбатан 57 фоизга кўпроқ.

Энг кўп фойда қуйидаги банкларда:

«Milliy Bank» — 1,45 трлн сўм;

«SQB» — 1,39 трлн сўм;

«Hamkorbank» — 1,27 трлн сўм;

«Kapitalbank» — 1,16 трлн сўм.

«Orient Finance Bank» — 793,5 млрд сўм.