Полшада 3,6 минг иш ўрни

Полшада ўзбекистонлик мутахассисларга бўлган талаб сезиларли даражада ошиб бормоқда. «Дунё» ахборот агентлиги маълумотига кўра, мазкур мамлакатдаги компаниялар жами 3,6 мингдан ортиқ ходимга эҳтиёж билдирган.

Маълум қилинишича, Ўзбекистоннинг Полшадаги элчихонаси томонидан меҳнат ресурслари салоҳиятини намойиш этиш ҳамда маҳаллий иш берувчилар билан ҳамкорликни кенгайтириш мақсадида махсус тақдимот ўтказилган.

Иш берувчи компаниялар

Ушбу тадбирда «Grupa Progres», «Gremi Personal», «Personnel International» каби 20 дан ортиқ йирик рекрутинг ва иш берувчи компаниялар иштирок этган. Музокаралар давомида иш берувчилар ўз эҳтиёжларини аниқ баён қилган.

Хусусан, логистика соҳаси учун 2000 нафар, хизмат кўрсатиш учун 800 нафар, саноат учун 600 нафар ҳамда қурилиш соҳаси учун 200 нафар ходим жалб этиш режалаштирилмоқда. Бу эса Ўзбекистондан меҳнат миграцияси ҳажмини янада ошириши мумкин.

«PRF Work» бошқаруви раиси Пётр Фонфара компания ва унинг мижозлари Ўзбекистондан кадрлар жалб қилишга тайёр эканини билдирди.

Шунингдек, Полша тадбиркорлар ва иш берувчилар иттифоқи департаменти раҳбари ўринбосари Юлия Ковалчук мамлакат иқтисодиёти доимий ишчи кучи талаб қилаётганини таъкидлаб, Ўзбекистонни ишончли ҳамкор сифатида қайд этди.

«Gremi Personal» вакили Анастасия Жук эса ўзбекистонлик мутахассисларга талаб юқори эканини билдириб, виза жараёнларини соддалаштириш муҳимлигини урғулади.

Учрашув якунида Ўзбекистон Миграция агентлиги ҳамда аккредитациядан ўтган бандлик ташкилотлари иштирокида қўшимча B2B музокаралар ўтказиш бўйича келишувга эришилди.