Путин яқин йилларда НАТО давлатларидан бирига ҳужум уюштиришга қарор қилиши мумкин

АҚШ разведкаси Владимир Путин яқин бир неча йил ичида НАТОнинг қатъиятини «синаб кўришга уриниши» ва бунинг учун альянс давлатларидан бирига чекланган ҳужум уюштириши мумкин, деб ҳисобламоқда. Бундай тахминлар АҚШ разведкасининг янги ҳисоботларида келтирилган. Бу ҳақда «The Wall Street Journal» ёзмоқда.

Ҳозиргача АҚШда Путин Украинадаги жанговар ҳаракатлар давом этаётган бир пайтда НАТО билан зиддиятни янада кучайтирмайди, деган қараш мавжуд эди. Бироқ ҳозир бу баҳо ўзгарган. Таҳлилчиларнинг фикрича, Россия-Украина урушида кўзга кўринадиган ютуқлар йўқлиги фонида Россия президенти қандайдир сезиларли ғалабага муҳтож бўлиши мумкин.

WSJ ёзишича, АҚШда «Путин бурчакка сиқиб қўйилса, янада хавфлироқ бўлиши мумкин», деган хавотир бор.

Разведка кўриб чиқаётган эҳтимолий таҳдидлар кўлами турлича. Улар киберҳужумлардан ёки ҳудудни эгаллаш учун ҳарбий кийимида белгилари бўлмаган аскарларни юборишдан тортиб, НАТОнинг шарқий қанотидаги давлатлардан бирига чекланган бостириб киришгача бўлиши мумкин. Сўнгги сценарийнинг эҳтимоли ҳозирча паст деб баҳоланмоқда, бироқ вақт ўтиши билан бу хавф ошиши мумкин.

Америкалик расмийларнинг фикрича, эҳтимолий ҳужумдан мақсад НАТО альянсини бўлиб юбориш бўлиши мумкин. Тўлиқ кўламли босқин НАТО Низомининг коллектив мудофаага оид 5-моддасини ишга туширади. Бироқ гибрид ҳужумлар ёки киберҳужумлар содир бўлган тақдирда альянснинг қандай ҳаракат қилиши кераклиги бўйича аниқ белгиланган режа мавжуд эмас. Путин, масалан, бундай вазиятда АҚШ иттифоқчиларига фақат чекланган ёрдам кўрсатиши мумкин, деб ҳисоблаш эҳтимоли бор.

АҚШ разведкаси баҳосига кўра, Россиянинг бундай тажовузкор ҳаракатлари 2026-йил кузидан 2029-йилгача бўлган даврда содир бўлиши мумкин. НАТО WSJ’га берган расмий изоҳида альянс «турли сценарийларни доимий равишда кўриб чиқаётгани» ва уларга тайёргарлик кўраётганини билдирди. Альянс вакили Мартин О’Доннелл таъкидлашича, НАТО «зарурат туғилганда тийиб туриш ва мудофаа қилишга тайёрлигини» намойиш этишда давом этмоқда.

Литва мудофаа вазири Робертас Каунас Россия Болтиқбўйи мамлакатларидаги муҳим инфратузилмаларга зарба бериш имкониятини кўриб чиқаётганини маълум қилди. Унинг сўзларига кўра, Москва бунинг учун Украинада қўлга киритилган дронлардан фойдаланиши мумкин. Каунас эҳтимолий ҳужумлардан мақсад Ғарб иттифоқчилари орасида Украинага бўлган ишончни сусайтириш ва унинг қўллаб-қувватланишини камайтириш бўлиши мумкинлигини айтди. Шу билан бирга, у ҳозирча «тўғридан-тўғри таҳдид» мавжуд эмаслигини таъкидлади.

Эслатиб ўтамиз, аввалроқ Путин Ўзбекистон ва Қозоғистон билан ҳарбий келишувларни қайта кўриб чиқмоқчилиги ҳақида ёзган эдик.