Путинга ёлғон ахборот берилмоқда — ISW
Таҳлилчиларнинг фикрича, Россия томонидан тарқатилаётган видеолар сохта ва Кремл Ғарб давлатларини ўз устунлигига ишонтиришга уринмоқда.
«Урушни ўрганиш институти» («ISW») Россия ҳарбий қўмондонлиги президент Владимир Путинга Украинанинг шимолидаги жанговар ҳаракатлар ҳақида ҳақиқатга мос келмайдиган маълумотлар тақдим этаётганини маълум қилди.
Таҳлилчиларнинг қайд этишича, Россия томони 22 июлдан буён деярли ҳар куни Харков ва Суми вилоятларидаги янги аҳоли пунктлари эгалланганини эълон қилиб келмоқда. Жумладан, 29 июл куни Новая Сеч, 30 июл куни эса Малая Слободка, Могрица ҳамда Харков вилоятидаги Веревка эгаллаб олингани ҳақида хабар берилган.
Бироқ «ISW» ушбу ҳудудларни эгаллаш учун зарур бўлган кучлар қайта жойлаштирилгани, техника тўплангани ёки кенг кўламли ҳужумлар амалга оширилганини тасдиқловчи далиллар йўқлигини таъкидлаган.
Баҳсли даъволар
Украина Мудофаа кучлари ҳам Россиянинг Малая Слободка, Могрица ва Новая Сеч эгаллангани ҳақидаги баёнотларини рад этган.
«ISW» маълумотига кўра, Россия пиёда бўлинмалари шимолий йўналишда инфилтрация ҳаракатларини давом эттирмоқда. Шу билан бирга, айрим ҳарбийлар аҳоли пунктларида Россия байроғини ушлаб тургани акс этган видеоларни, жумладан сунъий интеллект ёрдамида тайёрланган материалларни тарқатиб, ҳудуд назоратга олингани ҳақида тасаввур уйғотишга уринмоқда.
Таҳлилчиларнинг фикрича, Кремл бу каби хабарлар орқали АҚШ ва бошқа Ғарб давлатларини Россия урушда устунликка эришмоқда деган хулосага ишонтиришга интилаётган бўлиши мумкин.
Қарши ҳужумлар
«ISW»га кўра, Украина Қуролли кучлари айрим йўналишларда қарши ҳужумларни давом эттирмоқда. Бу эса Россия қўшинлари барча фронт бўйлаб қаршиликсиз илгарилаётгани ҳақидаги расмий баёнотларга зид келади.
Хусусан, институт Харков вилоятидаги Отрадное қишлоғи Украина назоратига қайтарилганини қайд этган. Шунингдек, Новая Сеч, Могрица, Иволжанское ва Писаревка яқинида амалга оширилган қарши ҳужумлар Россия қўшинларининг илгарилашини секинлаштиргани айтилмоқда.
