Қирғизистон собиқ вазири АҚШда курер бўлиб ишлаётгани маълум бўлди
У 2017 йилда президентлик сайловларида ҳам иштирок этган.
Қирғизистон парламенти (Жўқорғи Кенеш) собиқ депутати ва собиқ вазир Улуғбек Қочқоров АҚШда курер бўлиб ишлаётгани акс этган видео ижтимоий тармоқларда тарқалди. Бу ҳақда Қирғизистон оммавий ахборот воситаларида маълум қилинди.
Тарқалган видеотасвирларда собиқ амалдорнинг автомобил юкхонасига посилкаларни ортаётганини кўриш мумкин. Видеога берилган изоҳда унинг «Amazon»" компаниясида курер бўлиб ишлаётгани қайд этилган. Тармоқ фойдаланувчилари унинг ҳалол меҳнат билан шуғулланаётганини таъкидлаб, собиқ амалдорни қўллаб-қувватлашган.
Сиёсий фаолиятдан сўнг АҚШга кўчиш
Маълумот ўрнида, Улуғбек Қочқоров Жўқорғи Кенешнинг V чақириқ депутати бўлган ва 2017 йилда президентлик сайловларида иштирок этган. У 2018 йилнинг октябридан 2020 йилга қадар Қирғизистон Меҳнат ва ижтимоий ривожланиш вазири лавозимида ишлаган.
2020 йилнинг октябр воқеаларидан сўнг, Садир Жапаров ҳокимиятга келгач, Қочқоров вазир лавозимидан озод этилган. Ўшанда у ишдан олинганини интернет орқали билганини маълум қилганди.
Таъкидланишича, сўнгги бир неча йил давомида Улуғбек Қочқоров оиласи билан АҚШнинг Чикаго шаҳрида яшаб келмоқда. У оммавий ҳаёт тарзини олиб бормайди, шунингдек, кўчиб ўтиши ва ҳозирги фаолияти ҳақида бирор марта расмий изоҳ бермаган.
