Рақобат қўмитаси ресторан ва кафеларни огоҳлантирди
Қўмитага истеъмолчилардан айрим ресторан ва кафеларда таомлар нархидан ташқари 10–15 фоиз, баъзан эса 20 фоизгача хизмат ҳақи қўшимча тўлов сифатида ундирилаётгани ҳамда аввалдан депозит маблағлар талаб қилинаётгани ҳақида мурожаатлар келиб тушган.
Рақобат қўмитаси республикамиздаги барча турдаги умумий овқатланиш корхоналарини огоҳлантиради. Маълумотларга кўра, қўмитага айрим ресторан ва кафеларда таомлар нархидан ташқари 10–20 фоиз қўшимча хизмат ҳақи ундирилаётгани, шунингдек, олдиндан депозит талаб қилиниши кенгайиб бораётгани юзасидан мурожаатлар келиб тушган. Қўмита бу ҳолатлар истеъмолчилар ҳуқуқларига зид эканини таъкидлаб, умумий овқатланиш корхоналарини белгиланган қоидаларга амал қилишга чақирди.
Вазирлар Маҳкамасининг 75-сонли қарорига мувофиқ, умумий овқатланиш корхоналари ресторан, бар, кафе, ошхона, буфет, кичик ошхона каби турларга бўлинади. Ҳар бир турга хос хизмат тартиби аниқ белгиланган: ресторанларда юқори сифатли мураккаб таомлар таклиф этилади, барларда асосан ичимлик ва закускаларга хизмат кўрсатилади, кафелар эса енгил таомлар ва ичимликларга ихтисослашган. Ошхона, буфет ва кичик ошхоналарда эса оддий ва тез тайёрланадиган таомлар учун ўз-ўзига хизмат қилиш ёки официант орқали хизмат кўрсатиш имконияти мавжуд.
Истеъмолчи ҳуқуқлари тўғрисидаги қонунга кўра, мижозлар товар ва хизматлар ҳақида тўлиқ ва тўғри маълумот олиш, уларни эркин танлаш ва сифат талаб қилиш ҳуқуқига эга. Корхона эса хизматни белгиланган тартиб ва сифатда кўрсатиши шарт. Энг муҳими, истеъмолчини қўшимча товар ёки хизмат харид қилишга мажбурлаш, шу жумладан кўрсатилмаган хизмат учун ҳақ ундириш тақиқланади.
Шу асосда Рақобат қўмитаси умумий овқатланиш корхоналарини қўшимча хизматларни мажбурий равишда таклиф этмасликка, таомлар нархи, хизмат тартиби ва официант хизмати учун ҳақ миқдори ҳақида мижозларни олдиндан тўлиқ хабардор қилишга чақирди. Қўмита, шунингдек, қабул қилиш жараёнларида ўз-ўзига хизмат қилиш имкониятини таъминлаш зарурлигини эслатди.
«Ҳуқуқларингиз бузилганда Рақобат қўмитасининг 1159 қисқа рақами орқали мурожаат қилишингиз мумкин», — дейилади қўмита хабарида.
Эслатиб ўтамиз, аввалроқ Рақобат қўмитаси истеъмолчиларни биологик фаол қўшимчаларни «дори» сифатида тақдим этаётган рекламаларга ишонмасликка чақирган эди. Маълумотларга кўра, қўмитага ушбу маҳсулотлар бўйича 2 345 дан ортиқ фуқаролик мурожаатлари келиб тушган.
