Тинчлик бўйича Нобел мукофоти совриндори маълум ва у Трамп эмас
10.10.2025 | 15:003 дақиқа
Нуфузли мукофот венесуэлалик мухолифадаги сиёсатчи Мария Корина Мачадога берилди.
Венесуэлалик сиёсий фаол Мария Корина Мачадо 2025 йилги Тинчлик бўйича Нобел мукофоти лауреати деб топилди. Бу ҳақдаги қарор Норвегия Нобел қўмитаси томонидан 10 октябр куни Ослода эълон қилинди.
Қўмита раиси Ёрген Ватне Фриднеснинг таъкидлашича, Мачадо мукофотга Венесуэла халқи демократик ҳуқуқларини ҳимоя қилишдаги «тинимсиз меҳнати» ва диктатурадан демократияга тинч йўл билан ўтиш учун кураши учун лойиқ топилган. Унинг фаолияти мамлакатда сиёсий эркинлик ва адолатли сайловлар учун курашда муҳим аҳамият касб этган.
Бу йил Тинчлик бўйича Нобел мукофотига 338 номзод илгари сурилган — уларнинг 244 нафари жисмоний шахс, 94 таси эса ташкилотдир. Қиёсланганда, 2024 йилда номзодлар сони 286 нафарни ташкил этган.
Нобел қўмитаси ҳар йили дунёда тинчлик, инсон ҳуқуқлари ва демократияни ривожлантиришга ҳисса қўшган шахслар ва ташкилотларни тақдирлаб келади. 2024 йилда мукофот ядровий қуролсизланиш тарафдори бўлган япон ташкилоти Nihon Hidankyo‘га берилган эди. 2023 йилда эса эронлик ҳуқуқ ҳимоячиси Наргис Муҳаммадий аёллар ҳуқуқлари ва инсон эркинлиги учун кураши учун мукофотланган.
Тинчлик бўйича Нобел мукофоти динамит ихтирочиси Алфред Нобел васиятига мувофиқ 1901 йилдан буён топшириб келинади. Унинг ғояси — дунёда тинчлик, асраш учун интилаётган шахсларни эътироф этишдир.
Эслатиб ўтамиз, аввалроқ Доналд Трампнинг Нобел Тинчлик мукофотидан қуруқ қолгани ҳақида хабар берган эдик.
