Тошкентда ҳавони ифлослантирган 100 дан ортиқ объект фаолияти тўхтатилди
Махсус комиссия ўтказган рейдлар давомида иссиқхона, қурилиш ва транспорт соҳаларида қатор қоидабузарликлар аниқланиб, юзлаб масъул шахсларга маъмурий чоралар кўрилди.
Экология ва иқлим ўзгариши миллий қўмитаси Давлат экологик назорат инспекцияси бошлиғининг биринчи ўринбосари Икром Тоғаев 24–28 ноябр кунлари амалга оширилган назорат ишлари натижаларини эълон қилди.
Унга кўра, иссиқхоналар бўйича 1449 та объект ўрганилиб, экологик талабларга жавоб бермаган 67 та иссиқхона фаолияти тўхтатилди. Шунингдек, 403 нафар шахсга маъмурий баённомалар расмийлаштирилди. Газ тизимига қонуний уланиш мақсадида 19 та иссиқхона хўжалигига техник шартлар тақдим этилди.
Қурилиш объектларига оид назорат ишлари ҳам жиддий натижаларни кўрсатди. Тошкент шаҳрида 6,3 гектар майдонни эгаллаган 53 та ноқонуний қурилиш объекти аниқланди ва уларни бартараф этиш чоралари кўрилмоқда. 186 та ҳолатда атмосфера ҳавосининг ифлослантирилгани тасдиқланган, 235 та қурилиш майдонида эса кўкаламзорлаштириш нормалари бажарилмагани аниқланган.
Шу муносабат билан 34 та объектда ишлар вақтинча тўхтатилди, 188 нафар шахс маъмурий жавобгарликка тортилиши белгиланди. Ифлосланишнинг олдини олиш мақсадида 51 та объектга сув пуркагич ускуналари ўрнатилди.
Шунингдек, автотранспортга оид қоидабузарликлар ҳам кам кузатилмади. Юкни тентсиз ташиган 837 та транспорт воситаси ва меъёрдан ортиқ чиқинди чиқарган 206 нафар ҳайдовчига нисбатан маъмурий жарималар қўлланилди.
