Трамп Эронни «Ер юзидан супуриб ташлаш» билан таҳдид қилди

АҚШ Президенти Доналд Трамп Эрон Америка кемаларига Ҳўрмуз бўғозида савдо кемаларини кузатиб боришга тўсқинлик қилган тақдирда, ушбу мамлакатни йўқ қилиш билан таҳдид қилди. Бу ҳақда у «Fox News» телеканалига берган интервюсида сўз очди.

Трампга кўра, агар Эрон «Озодлик лойиҳаси» (Project Liberty) операциясида иштирок этаётган АҚШ кемаларига ҳужум қилса, у «ер юзидан супуриб ташланади».

«Бизда қурол ва ўқ-дорилар илгаригидан кўра кўпроқ ва анча юқори даражада. Бизда энг яхши ускуналар бор. Бутун дунё бўйлаб базаларимиз ва уларда тўлиқ бутланган техникамиз мавжуд. Агар керак бўлса, биз уларнинг барчасидан фойдаланамиз», — деб баёнот берди АҚШ президенти.

Ушбу таҳдидлар фонида АҚШ Марказий қўмондонлиги операция доирасида қўшимча эсминецлар, самолётлар ва 15 минг ҳарбий хизматчи сафарбар этилганини маълум қилган.

Шу билан бирга, Оқ уй раҳбари кичик бизнес вакиллари билан учрашув чоғида ўз лавозимини тарк этиш муддати ҳақида ҳазил қилди. Трамп маъмурият томонидан бизнесни қўллаб-қувватлаш бўйича кўрилаётган чоралар ҳақида гапирар экан, ушбу имкониятлардан келажакда ўзи ҳам фойдаланиши мумкинлигини таъкидлади.

«Мен лавозимимни тарк этганимда — айтайлик, саккиз ёки тўққиз йилдан кейин — мен бундан фойдалана оламан», — деди у. Учрашув Оқ уйнинг расмий «YouTube» канали орқали трансляция қилинди.

Маълумот учун, АҚШ Конституциясига киритилган 22-тузатишга мувофиқ, бир шахс икки мартадан ортиқ президент этиб сайланиши тақиқланган. Трамп аввалроқ 2028 йилги сайловларда республикачилар партиясидан Жей Ди Вэнс ва Марко Рубио каби истиқболли номзодлар борлигини қайд этган эди.