Трамп режаси қайта ишланди: Киев учун чекловлар олиб ташланди

Женевада Украина делегацияси билан ўтказилган музокаралардан сўнг, Доналд Трамп маъмурияти томонидан таклиф этилган қисқартирилган тинчлик режаси жиддий ўзгаришларга учради.

ABC News хабарига кўра, янги лойиҳада Украина Қуролли кучлари сонини қисқартиришга оид талаб олиб ташланган. Илк вариантда Киевга армиясини 1 млн нафардан 600 минггача қисқартириш таклиф қилинган эди. Украина ва Европанинг муқобил режасида эса чегара 800 минг нафар этиб белгиланган.

Бундан ташқари, Россияни ҳарбий жиноятлар учун амнистия қилишни кўзда тутувчи банд ҳам янгиланган режадан чиқариб ташланган. Politico манбаси хабар беришича, ҳужжатда Донбассни Россияга бериш, Запорижжя ва Херсонда фронтни музлатиш каби ҳудудий масалалар ҳам ўзгаришга учраган, аммо аниқ тафсилотлар берилмаган. Бу масалалар Украина президенти Володимир Зеленский ва АҚШ номзоди Доналд Трамп ўртасидаги музокараларда кўрилиши кутилмоқда.

The Washington Post маълумотларига кўра, Россия–АҚШ муносабатларига доир бандлар ҳам режадан чиқарилган. Шунингдек, Россия Марказий банкининг музлатилган 100 млрд доллар захираларидан фойдаланиш ва ундан 50 фоиз даромадни АҚШга бериш ғояси ҳам бекор қилинган.

Украина ташқи ишлар вазири ўринбосари Сергей Кислица Financial Times нашрига берган изоҳида, ҳудудий масалалар, НАТО ва Россия муносабатлари каби бир неча баҳсли нуқталар «қавсга олингани»ни айтган. Унинг таъкидлашича, янги лойиҳа аввалги нусхадан сезиларли даражада фарқ қилади ва Киев энди баъзи масалаларда мувозанатли ечимга тайёр.

The New York Times нашри эса АҚШ сенатори Марко Рубио НАТОга аъзо давлатлар Украина ҳудудига қўшин жойлаштиришини тақиқлайдиган ва Украинага НАТОга кириш йўлини бутунлай ёпадиган бандларни ҳозирча режадан чиқариб юборганини маълум қилди.

Кремл матбуот котиби Дмитрий Песков сўзларига кўра, АҚШ бу ўзгарган, 19 банддан иборат янги лойиҳани Россияга ҳали тақдим этмаган. «Ҳозирда ягона амалий ҳужжат — бу Трамп режасидир. У музокаралар учун яхши асос бўлиши мумкин», деди у.