Трампнинг кейинги нишонлари қайси давлатлар бўлиши мумкин?
Венесуэладаги операциядан сўнг АҚШ президенти Доналд Трампнинг навбатдаги ташқи сиёсий нишонлари сифатида айрим давлатлар тилга олинмоқда.
АҚШ президенти Доналд Трамп Венесуэлада Николас Мадуро ҳокимиятини ағдарганидан кейин ташқи сиёсатда янада кескин қадамлар ташлаши мумкин. Бу ҳақда «The Guardian» нашрининг катта халқаро мухбирларидан бири Жулиан Боргер фикр билдирди.
Журналистнинг таъкидлашича, Венесуэладаги воқеалар Трамп учун хорижий ҳудудлар, нефт ва табиий ресурслар Нобел мукофотидан кўра жозибалироқ эканини кўрсатди. Унинг сўзларига кўра, мазкур операция Эрон ва Дания каби давлатларда жиддий хавотир уйғотган.
Боргер қайд этишича, сўнгги кунларда Трамп Эрондаги ҳукуматга қарши намойишчиларни қўллаб-қувватлашини очиқ айтган. Шу билан бирга, америкалик расмийлар Гренландияни назоратга олиш эҳтимоли ҳақида ҳам бир неча бор кескин баёнотлар берган.
Декабрь ойида Дания ҳарбий разведка хизмати АҚШни мамлакат хавфсизлиги учун таҳдид сифатида баҳолаган. Бу эса НАТО иттифоқчилари ўртасида илгари деярли тасаввур қилиб бўлмайдиган ҳолат сифатида қабул қилинди.
3 январь куни Доналд Трамп Кубани ҳам АҚШ «эътиборидаги давлатлар» рўйхатига қўшганини маълум қилди. У Кубани Венесуэлага ўхшатиб, «Куба халқини ҳам қутқаришни исташи»ни айтган.
Шу куни АҚШ президентининг ички хавфсизлик бўйича маслаҳатчиси Стивен Миллернинг рафиқаси Кэти Миллер ижтимоий тармоқда АҚШ байроғи рангларида бўялган Гренландия харитасини жойлаштириб, уни «яқинда» деган изоҳ билан қолдирди. Бунга жавобан Даниянинг АҚШдаги элчиси Йеспер Меллер Серенсен мамлакат ҳудудий яхлитлигига ҳурмат билан ёндашишга чақирди.
Россия ва Америка тадқиқотлари институти катта илмий ходими Павел Кошкин «Ведомости» нашрига берган шарҳида Трамп оралиқ муваффақиятларни кўрса, ташқи сиёсатда янада қатъий ҳаракатларга берилиши мумкинлигини айтди. Унинг фикрича, эҳтимолий янги нишонлар орасида энг реал сценарий Эрон ҳисобланади.
Экспертга кўра, Венесуэлага қилинган ҳужум ва Эронга нисбатан таҳдидлар Трамп дипломатиясининг «куч позицияси»га асосланган услубига мос келади. Шу билан бирга, қарор қабул қилишда унинг жамоасидаги изоляционист қарашдаги сиёсатчиларнинг роли ҳал қилувчи бўлиши мумкин.
