Украина Донбассдан ўз қўшинларини олиб чиқишга рози бўлди — Politico

Украина АҚШга тақдим этган сўнгги тинчлик режаси Донбасс ҳудудидан украин ва рус қўшинларини олиб чиқиш ҳамда у ерда «эркин иқтисодий зона» ташкил этишни назарда тутади. Бу ҳақда Politico нашри музокаралардан хабардор манбаларга таяниб хабар қилди.

Оқ уй матбуот котиби Кэролайн Левитт 11 декабр куни президент Доналд Трамп Украина томонидан тақдим этилган ҳужжат билан танишганини тасдиқлади. Манбаларга кўра, мазкур режа 12 декабр куни АҚШ, Украина, Франция, Германия ва Буюк Британия иштирокида муҳокама қилиниши кутилмоқда.

Шу билан бирга, Politico суҳбатдошлари Россия томони «демилитаризация қилинган Донбассда эркин иқтисодий зона» яратиш ғоясини қўллаб-қувватлашига шубҳа билан қарамоқда. Уларга кўра, Трамп маъмурияти Украинани можарода заиф томон сифатида баҳоламоқда. Айниқса, яқинда юзага келган коррупция билан боғлиқ можаро Оқ уй томонидан Киевга босим ўтказиш воситаси сифатида қўлланилмоқда.

Россия президенти Владимир Путин эса бир неча бор урушни тўхтатиш шарти сифатида Украина қўшинларининг Донбассдан чиқарилишини талаб қилган. У Донбассни «тарихан Россия ҳудуди» деб атаб, уни ҳар қандай йўл билан қайтариш мумкинлигини таъкидлаган.

11 декабр куни Украина президенти Володимир Зеленский эркин иқтисодий зона ташкил этиш ташаббуси АҚШ томонидан илгари сурилганини маълум қилди. Унга кўра, таклифга биноан Украина қўшинлари Донбасснинг ҳали ишғол қилинмаган ҳудудларини тарк этади, Россия қўшинлари эса у ерга кирмайди. Бироқ мазкур ҳудудни ким бошқариши масаласи очиқ қолмоқда.

Зеленский шунингдек, ҳар қандай ҳудудий ён бериш масаласи фақат референдум орқали ҳал қилиниши мумкинлигини таъкидлади. Шу билан бирга, музокараларда Харкив, Суми ва Днепропетровск областларининг ишғол остидаги айрим ҳудудларидан Россия қўшинларини олиб чиқиш масаласи ҳам муҳокама қилинмоқда. Запорижжя АЭС бўйича эса АҚШ уни қўшма бошқариш вариантларини кўриб чиқишни таклиф этган.