Украинанинг Купянскдаги операцияси Россия режаларини чиппакка чиқарди
Купянскда Украина Қуролли кучларининг муваффақиятли операцияси Россия ҳарбий режаларини издан чиқариб, Владимир Путин баёнотларини ҳам шубҳа остига қўйди.
Купянск шаҳрида Украина Қуролли кучлари томонидан амалга оширилган операция Россия армиясининг режаларини барбод қилди. Украина хавфсизлик ва ҳамкорлик маркази раҳбари Сергей Кузаннинг таъкидлашича, Купянскни озод этиш — бу пухта режалаштирилган ва комплекс ҳарбий операция намунаси ҳисобланади.
Шаҳар Оскил дарёсининг сўл соҳилида жойлашган бўлиб, уни қамалдан қутқариш учун Россия қўшинларининг таъминот йўлларини ўнг соҳилдаги бир қатор қишлоқлар орқали узиш талаб этилган.
Кузаннинг айтишича, Украина кучлари сони жиҳатдан кам бўлишига қарамай, мувофиқлаштирилган ҳаракатлар туфайли операция қисқа вақт ичида муваффақиятли якунланган. Бу Россия қўмондонлиги кутмаган сценарий бўлган.
Натижада, Россия қўшинларининг тахминан 200 нафарга яқин қисми Купянскнинг шимолий чекка ҳудудларида қуршовда қолган. Улар орқа таъминотдан узилган ҳолда қолиб, дронлар орқали ўқ-дори, озиқ-овқат ва дори-дармон олишга мажбур бўлмоқда.
Шу билан бирга, мазкур операция Россиянинг Донецк областининг шимоли томон илгарилаш режаларини ҳам йўққа чиқарган. Режага кўра, Купянск ва Лиман–Северск йўналишлари бирлашиб, Словянск, Краматорск ва Святогорск агломерациясига босим ўтказилиши кўзда тутилган эди.
Сергей Кузаннинг таъкидлашича, ушбу операция Россия президенти Владимир Путиннинг Купянск Россия назоратида экани ҳақидаги баёнотларини ҳам инкор этди. Унга кўра, воқеалар ривожи Путиннинг маълумотлари ҳақиқатга тўғри келмаганини кўрсатди.
Купянскдаги муваффақият АҚШда ҳам муҳокама марказига айланди. Кузаннинг айтишича, мазкур операция Вашингтонда Украинага босим ўтказиш тарафдорлари позицияларини заифлаштирган.
