«Ухлаётган айиқни уйғотмаслик керак эди» — Лукашенко Украина, Россия ва Қрим ҳақида

Беларус президенти Александр Лукашенко Украинадаги урушнинг келиб чиқиш сабаблари ҳақида гапирди. У ўз фикрларини NewsMax TV телеканалига берган интервюсида баён қилди.

Беларус етакчисининг таъкидлашича, 2014 йилдан сўнг, Украинанинг янги ҳукумати русларга оид бўлган барча нарсани йўқ қилиш йўлига ўтган.

«Сизга тажрибали сиёсатчи сифатида айтяпман: агар ухлаётган айиқнинг ёнида яшаётган бўлсангиз, уни уйғотманг, яхшиси тил топишиш йўлини изланг», — деди у.

Лукашенко жанговар ҳаракатларнинг давом этиши Украина давлат сифатида йўқ бўлиб кетишига олиб келиши мумкинлигидан огоҳлантирди. «Менинг фикримча, у дунё харитасидан бутунлай йўқолиб қолиши мумкин», — деди Лукашенко.

Бундан ташқари, Беларус раҳбари можаро давом этса, эскалация янада кучайиши ва бу глобал тус олиши мумкинлигини айтди. Шу муносабат билан Лукашенко Ғарбни Украинага янги қурол-яроғ етказиб беришдан воз кечишга чақирди.

Лукашенко, шунингдек, Россия давлат раҳбари Владимир Путин Украина можаросида тинчликка эришиш тарафдори эканини айтди. Унинг сўзларига кўра, Украина президенти Володимир Зеленский ҳам тинчлик ўрнатилишини хоҳлайди, бироқ уларнинг инқирозни ҳал қилиш борасидаги қарашлари турличадир.

Беларус президенти Қримнинг кимга тегишли экани масаласига ҳам тўхталиб, украинлар ярим оролни Россияга ўзлари бериб қўйганини ва у учун жанг қилиш ниятида бўлмаганини айтди. Унинг сўзларига кўра, бугунги кунда Украина расмийлари, жумладан Зеленский ҳам Қрим Украинаники эканини даъво қилмоқда, бироқ 2014 йилда ярим орол учун «ҳеч ким урушмаган ва курашмаган».

«Буларнинг ҳаммаси кўз ўнгимда содир бўлди. Украина томонидан бирорта ҳам ўқ узилмади. Агар бу сенинг еринг бўлса, нима учун уни ҳимоя қилмадинг? Украинлар уни шунчаки бериб юборишди, Россияга қўшқўллаб топширишди», — деди Лукашенко.