Европада тирбандликка қарши янги йўл белгиси жорий этилмоқда
Европада тўртбурчак кўк фонда ромб шакли туширилган янги йўл белгиси жорий этилмоқда. Ундан кўзланган мақсад — тирбандликни камайтириш ва экологик самарани кучайтириш.
Европа йўл инфратузилмасида янги турдаги белгилар пайдо бўлмоқда. Кўк фонга оқ ромб шакли туширилган ушбу белги хорижда, хусусан АҚШда қўлланилаётган моделдан олинган бўлиб, янги тартиб тирбандликни қисқартириш ва йўловчи ташиш самарадорлигини оширишга хизмат қилади.
Мазкур белги туширилган йўлак (полоса) фақат белгиланган турдаги автомобиллар учун мўлжалланган. Жумладан, жамоат транспорти, такси, электр автомобиллари ва камида икки нафар йўловчи ташувчи шахсий автомобиллар ушбу белги ўрнатилган йўл бўлагидан фойдаланиши мумкин.
Белги орқали кўзланган мақсад — бир автомобилда кўпроқ одам ташишни рағбатлантириш, шу орқали тирбандликни камайтириш, ёнилғи сарфини қисқартириш ва экологик юкламани пасайтиришдир.
Европада янги йўл белгисини энг фаол жорий этаётган мамлакатлардан бири — Франция. Гренобл, Лион ва Страсбург шаҳарларида ўтказилган пилот лойиҳалар натижали бўлганидан сўнг белги бутун мамлакатда кенг қўллана бошлади. Кейинчалик Германия, Испания ва бир қатор бошқа Европа давлатларида ҳам белги жорий қилинаётгани кузатилмоқда.
Экспертлар таъкидлашича, бу белгининг самарали ишлаши йўллар инфратузилмасига бевосита боғлиқ. Ҳар бир тасманинг ўлчами, ажратилиши, камерали назорат ва ҳаракат интенсивлиги каби омиллар инфратузилмадан юқори талаб қилади. Шу сабабли бу амалиётни жорий қилиш ҳар бир мамлакатда алоҳида техник ва ҳуқуқий тайёргарликни талаб этади.
