Зеленский Россия билан урушни жорий фронт чизиғида тўхтатиб туришга розилигини билдирди
Украина президенти Воладимир Зеленский Россия билан урушни ҳозирги фронт чизиғи бўйича тўхтатиш имкониятини қўллаб-қувватлашини билдирди. У бу ҳақда 21 октябрь куни Fox News телеканалига журналист Брайан Килмидга берган интервьюсида маълум қилди.
Зеленскийдан фронтдаги ҳозирги вазиятни сақлаб қолишни назарда тутувчи тинчлик келишувига рози бўлиш-бўлмаслиги сўралган. Украина президенти бунга ижобий жавоб бериб, урушни тўхтатиш уни якунлашнинг реал йўли бўлиши мумкинлигини айтди.
«Биз буни ўт очишни тўхтатиш ёки президент Трамп айтганидек, одамларнинг ўлдирилишини тўхтатиш деб атаймиз. Вазиятни музлатиш ва тўхтатиш», — деди Зеленский.
Украина хавфсизлик кафолатларини сўрайди
Зеленскийнинг таъкидлашича, ўт очишни тўхтатишдан кейин Украина АҚШ президенти Дональд Трамп ва Европа давлатларидан хавфсизлик кафолатларини сўрайди.
«Энг муҳими — тинчлик ва унинг хавфсизлигини таъминлаш», — деди Украина президенти.
Унинг сўзларига кўра, Украина учун урушнинг қайта бошланиши, ҳудудларнинг яна босиб олиниши ва янги ҳужумларнинг олдини олиш муҳим. Шу сабабли Киев ўт очишни тўхтатиш, музокаралар ўтказиш ва хавфсизлик кафолатларини олишни мақсад қилмоқда.
Зеленскийнинг баёноти ҳозирча Украина ва Россия ўртасида келишувга эришилганини англатмайди.
