Зеленский Украина НАТО аъзоси бўла олмаслигини тан олди

Украина президенти Володимир Зеленский Киев энергиявий сулҳга тайёр эканини билдирди, аммо бу иш фақат Россия ҳам шундай сулҳга ўз тайёрлигини намоён этгандагина амалга ошиши мумкинлигини қайд этди. Унинг айтишича, энергия инфратузилмаларига зарбалар тўхтатилиши аҳоли хавфсизлиги учун муҳим қадам бўлади, лекин бу бир томонлама амалга ошмайди.

Зеленский воқеалар ривожи фонида Украина НАТОга аъзо бўлиш имконияти ҳозирча мавжуд эмаслигини ҳам тан олди.

«Биз реалистмиз. Биз чиндан ҳам НАТО аъзоси бўлишни истаймиз — бу адолатли. Лекин шуни ҳам биламизки, АҚШ ҳам, яна бир нечта давлатлар ҳам ҳозирча Украинани алянсда кўрмоқчи эмас. Шак-шубҳасиз, Россия ҳам ҳеч қачон у ерга қўшилишимизни истамайди», — деди у.

Зеленский шунингдек, Украина ҳали АҚШга янгиланган тинчлик режасини топширмаганини айтди. «Бугун ва эртага маслаҳатчилар даражасида ишлаяпмиз. Бўлса керак, эртага топширамиз», — деди у. У музокара жараёнида учта асосий ҳужжат муҳокама қилинаётганини тасдиқлади.

Биринчи ҳужжат — 20 банддан иборат рамкавий тинчлик модели бўлиб, у доимий янгиланмоқда. Иккинчиси — хавфсизлик кафолатлари. Зеленский Украина ҳарбийлари ва АҚШ ўртасидаги мулоқотдан кейин қўшимча таклифларни кутаётганини билдирди. Учинчи ҳужжат эса қайта тиклаш дастури бўлиб, у фақат уруш тугагач ёки ўт очишни тўхтатиш амалга ошгач ишлайди.

Зеленский биринчи марта Путин билан учрашганида Қримни қайтариш истагини айтганини ҳам тасдиқлади. «Балким айтгандирман ва бу ишимни тўғри деб ҳисоблайман. Ростини айтсам, бугунги кунда бунга кучимиз етмайди, етарли кўмак ҳам йўқ», — деди у.