Зеленскийнинг баёноти Трампнинг Украина бўйича режасини чиппакка чиқариши мумкин

The Washington Post нашрининг ёзишича, Володимир Зеленскийнинг «Украина ҳеч қандай ҳудудни бермайди», деган қатъий баёноти АҚШ президенти Доналд Трамп таклиф қилган тинчлик режасининг самарадорлигини жиддий савол остида қолдирди. Зеленский Лондонда Британия, Франция ва Германия етакчилари билан учрашувдан сўнг бу позицияни яна бир бор оммага очиқ баён қилди. Унга кўра, ҳеч қандай тезлаштирилган музокара ёки ташқи босим Украинадан ўз еридан воз кечишни талаб қила олмайди.

Зеленскийнинг таъкидлашича, Украина қонунлари ва халқаро ҳуқуқ нормалари ҳудудий интеграцияни кафолатлайди. У мамлакат ҳудудининг бир қисмини бериш – нафақат сиёсий, балки ахлоқий жиҳатдан ҳам мумкин эмаслигини қайд этди. WP маълумотларига кўра, ушбу баёнот Трамп режасининг энг баҳсли қисми — Донбассни Россияга де-факто топшириш тамойилини инкор этади ва музокаралар жараёнини жиддий қийинлаштиради.

Нашр манбаларининг таъкидлашича, Европа етакчилари ҳам Украина позициясини қўллаб-қувватламоқда. Улар Москвага куч ишлатиб чегараларни ўзгартириш имконини бериш келгусида янги босқинларга йўл очиши мумкинлигини айтишмоқда. Британия Бош вазири Кийр Стармер ҳар қандай келишув Украина учун қаттиқ хавфсизлик кафолатларини ўз ичига олиши кераклигини билдирди.

WP манбаларига кўра, Трамп режасининг дастлабки версияси Киев ва Европа пойтахтларида жиддий хавотир уйғотган. Айрим таҳлилчилар уни «Кремл манфаатларига жуда мос тушадиган», ҳужжат, деб баҳолаган. Украина ва Европа томонини қониқтирмаган бир қатор бандлар музокаралар давомида чиқариб ташланган бўлса-да, ҳудуд масаласида келишувга келиш имконсиз бўлиб турибди.

Киев Вашингтон етакчилигидаги дипломатик фаолиятни қўллаб-қувватлаётган бўлса-да, Украина раҳбарияти Россиянинг эгаллаган ҳудудларини мустаҳкамлаб қўядими ёки йўқми, деган саволда Ғарбнинг яхлит позициясини кутаяпти. Бу масала музокараларнинг кейинги босқичида ҳал қилувчи аҳамият касб этади.