Зеленскийнинг имижига зарба: коррупция иши унинг яқинларини қамраб олмоқда — NYT

Украина президенти атрофидаги 100 млн долларлик коррупция тергови Зеленскийнинг атрофидаги янги яқин доирани силкитмоқда ва уруш даври қаҳрамони сифатидаги нуфузини шубҳа остига қўя бошлади, деб ёзмоқда The New York Times нашри.

2019 йилда коррупцияга қарши кураш ваъдалари билан ҳокимиятга келган Володимир Зеленский бугун ана шу мавзуда ўзининг энг оғриқли синовига дуч келмоқда. Мамлакатнинг давлат ядровий энергетика компаниясида 100 млн доллар йирик маблағ ўғирлангани ва унинг яқин ишбилармон шериги Тимур Миндич бу ишда бош ролни ўйнагани фош этилди.

Зеленский билан бирга ташкил этилган юмористик студия ҳаммуассиси ҳисобланмиш Миндич ҳибсга олиш қарори чиқишидан аввал мамлакатдан қочган. Тергов давомида икки вазир истеъфога чиқди, Бош вазир эса Миндичга нисбатан санкциялар жорий қилишни таклиф қилди.

Зеленский ушбу терговни қўллаб-қувватлашини айтган бўлса-да, у тергов органлари мустақиллигига шубҳа уйғотадиган ҳаракатлар қилгани ҳам маълум. Хусусан, ёзда у коррупцияга қарши идора фаолиятини чеклашга уриниб, биринчи марта уруш пайтидаги оммавий норозилик намойишларига сабабчи бўлди.

Аҳоли учун эса энг алам қиладигани — миллионлаб одамлар Россия ҳужумлари оқибатида кундалик электр ўчирилишлар билан қийналиб яшар экан, ана шу энергетика компаниясида ўғрилик содир бўлганидир.

Украина миллий коррупцияга қарши бюроси ҳафта давомида ҳар кун янги далиллар, аудиоёзувлар ва видеоматериаллар билан ишни ошкор этмоқда. Ҳозирча Зеленский бевосита терговга тортилаётгани йўқ, лекин жамоатчилик унга ишонч билан қарашда давом этишини кафолатлайдиган вазият қолмаган.