Нега озиқ-овқат ишлаб чиқарувчи компания Тошкентда автобус бекатларини қурмоқда?

Тошкент шаҳрида янги автобус бекатларини қуриш ҳуқуқи нима учун қурилиш соҳасида тажрибага эга компанияга эмас, балки чипслар ва ичимликлар ишлаб чиқарувчи корхонага берилгани юзасидан расмийлар изоҳ берди.

Vaqt.uz журналисти Феруза Нажмиддинованинг мазкур саволига жавоб берган Тошкент шаҳар Йўл ҳаракатини ташкил этиш маркази раҳбари ўринбосари Фурқат Муродовнинг айтишича, лойиҳа очиқ электрон аукцион орқали амалга оширилган.

Унга кўра, аукционга чиқишдан аввал тадбиркорлар учун бекатларнинг дизайни, конструкцияси, эксплуатацияси, тозалиги ва уларга туташ ҳудудларни ободонлаштириш бўйича аниқ талаблар белгиланган.

«Биз аукцион эълон қилдик. Аукционга чиқаргандан кейин бу корхона ютган бўлса, шартларга жавоб берса, бу корхона билан ишлаймиз. Кейинги аукционимизда сиз айтгандек бошқа корхона ғолиб бўлса, бошқа корхона билан ишлаймиз. Биз аукцион ғолиби билан ишлайми», — деди Муродов.

Нега айнан озиқ-овқат ишлаб чиқарувчи компания?

Расмийнинг таъкидлашича, жамоат транспорти бекатларидан фойдаланиш лойиҳаси аслида реклама бизнеси билан чамбарчас боғлиқ.

Шу боис реклама берувчи йирик компаниялар бундай лойиҳаларда кўпроқ манфаатдор бўлади.

Муродовнинг айтишича, Ewi Snacks Ўзбекистонда Pepsi бренди маҳсулотларини ишлаб чиқарувчи йирик компания ҳисобланади ва реклама жойларига эҳтиёжи юқори бўлгани учун аукционда фаол қатнашган бўлиши мумкин.

«Компания бекатда ўзини рекламасини, ўзини маҳсулотини реклама қилишдан манфаатдор, шунинг учун қатнашган бўлиши мумкин. Бизда бекатни эксплуатация қилиш бўйича бунақа йирик тадбиркорлар йўқ», — деди у.

У сўзини давом эттираркан, шу вақтгача бу йўналишда асосан халқаро JCDecaux компанияси фаолият юритганини, аммо бу сафар очиқ аукционда бошқа иштирокчи ғолиб бўлганини қайд этди.

Аукцион қандай ўтказилганди?

Эслатиб ўтамиз, 2025 йил февраль ойида Тошкент шаҳар ҳокимлиги пойтахтнинг 10 туманидаги 41 та автобус бекати майдончасини электрон аукционга қўйган эди.

Лотнинг бошланғич йиллик ижара нархи 209,5 млн сўм бўлган. Савдолар давомида нарх 459,5 млн сўмгача кўтарилган ва якунда Ewi Snacks компанияси ғолиб деб топилган.

Шартномага кўра, компания 36 ой давомида бекатлардан фойдаланиш ҳуқуқини олган.

Бекатларга қандай талаблар қўйилган?

Аукцион шартларига мувофиқ, ғолиб компания ягона дизайндаги замонавий бекатларни ўрнатиши ва уларни тўлиқ эксплуатация қилиши шарт.

Ҳар бир бекатда:

●     ёритиш тизими;

●     телефонларни қувватлаш портлари;

●     видеокузатув камералари;

●     112 хизматига фавқулодда мурожаат тугмаси;

●     автобусларнинг келиш вақтини кўрсатувчи электрон табло;

●     Wi-Fi ускуналари ўрнатилиши белгиланган.

Бундан ташқари, бекатлар ногиронлиги бўлган шахслар учун қулай бўлиши, сутканинг 24 соати фойдаланишга тайёр ҳолатда сақланиши, уларнинг тозалиги ва атрофи ободонлаштирилиши ҳам ижарачининг мажбуриятлари қаторига киради.

Шунингдек, лойиҳалаштириш, қурилиш, электр, сув ва бошқа муҳандислик тармоқларига уланиш билан боғлиқ барча харажатлар ҳам компания зиммасига юклатилган.

Қайд этилишича, агар белгиланган талабларнинг бирортаси бажарилмаса ёки сифатсиз бажарилса, ҳокимлик ижара шартномасини бир томонлама бекор қилиш ҳуқуқига эга.