«Nеw Port»да яна қонунбузилиши: мажмуанинг 6 та блокида ноқонуний қурилиш олиб борилган
Аввалроқ ушбу мажмуада уйлар ўзбошимчалик билан бузилгани ва тўртта кўп қаватли тураржой биноси тегишли рухсатномасиз қурилгани маълум қилинганди.
© Ijtimoiy tarmoqlarТошкент шаҳрининг Яккасарой туманида жойлашган «Nеw Port» тураржой мажмуасидаги 9 та блокнинг 6 тасида қурилиш-монтаж ишлари белгиланган тартибда рўйхатдан ўтказилмасдан амалга оширилган. Бу ҳақда Қурилиш ва уй-жой коммунал хўжалиги соҳасида назорат қилиш инспекцияси маълум қилди.
Инспекция «Mega Logistics Service» МЧЖ томонидан амалга оширилаётган қурилиш ишлари юзасидан назорат органлари, жумладан, инспекция етарли эътибор қаратмагани ҳақидаги муҳокамалар ортидан ўтказилган назорат тадбирлари натижалари бўйича изоҳ берди.
Назорат натижаларига кўра, қурилаётган 9 та блокдан фақат 3 таси Архитектура ва шаҳарсозлик кенгаши ишчи органининг ижобий хулосаси, экспертиза хулосаси ҳамда Тошкент шаҳар ҳудудий назорат қилиш инспекциясида белгиланган тартибда рўйхатдан ўтказилган ҳужжатларга эга экани аниқланган.
Бир неча марта огоҳлантирилган
Инспекция маълум қилишича, қолган 6 та блокда қурилиш ишлари тегишли тартибда рўйхатдан ўтказилмасдан давом эттирилган.
Шу муносабат билан буюртмачи — «Mega Logistics Service» МЧЖга бир неча марта бажарилиши мажбурий бўлган ёзма кўрсатмалар киритилган. Уларда қурилиш ишларини шаҳарсозлик ҳужжатлари асосида ташкил этиш ва объектларни инспекцияда рўйхатдан ўтказиш талаб қилинган.
Бироқ мазкур талаблар бажарилмагани сабабли компаниянинг масъул мансабдор шахслари маъмурий жавобгарликка тортилган. Шунингдек, буюртмачининг техник назоратчисига нисбатан ҳам таъсир чоралари қўлланилган. Инспекция тўпланган материалларни ҳуқуқий баҳо бериш учун ҳуқуқни муҳофаза қилувчи органларга юборганини билдирди.
Жиноят иши қўзғатилган
Инспекция таъкидлашича, объектда аниқланган қонунбузилишлар эътиборсиз қолдирилмаган ва улар юзасидан ваколат доирасида барча зарур назорат ҳамда ҳуқуқий чоралар кўрилган.
Эслатиб ўтамиз, аввалроқ Тошкент шаҳар прокуратураси ушбу мажмуада тегишли рухсатномаларсиз битта 20 қаватли, иккита 19 қаватли, битта 12 қаватли ва битта 2 қаватли турар жой бинолари ўзбошимчалик билан қурилганини маълум қилган эди. Ушбу ҳолатлар юзасидан «Mega Logistics Service» МЧЖ мансабдор шахслари ва бошқа шахсларга нисбатан жиноят иши қўзғатилган.
