Ўзбекистон илк ипотека облигацияларини чиқарди

Ўзбекистон Республикаси Истиқболли лойиҳалар миллий агентлиги 40,5 млрд сўм миқдоридаги бирламчи ипотека облигациялари эмиссиясини давлат рўйхатидан ўтказди. Бу ҳақда Истиқболли лойиҳалар миллий агентлиги хабар берди.

Мазкур эмиссия Президентнинг 2025 йил 21 февралда қабул қилинган «Уй-жой ва ипотека бозорини янада ривожлантиришга оид қўшимча чора-тадбирлар тўғрисида»ги фармони ижроси доирасида амалга оширилди.

Чиқарилиш ипотека облигацияларини эмиссия қилиш ва муомалага чиқариш бўйича «Тартибга солиш қумдони» махсус ҳуқуқий режими доирасида тасдиқланган вақтинчалик низом талабларига мувофиқ ташкил этилди.

Эмитент сифатида ипотека агенти вазифасини бажарувчи «УМРC SPV» МЧЖ иштирок этмоқда. Облигациялар ипотека қопламаси ҳамда «Ўзбекистон ипотекани қайта молиялаштириш компанияси» АЖ кафиллиги билан таъминланган. Бир дона облигациянинг номинал қиймати 100 сўм этиб белгиланган.

Ипотека бозори учун янги босқич

Эмиссия доирасида жалб қилинадиган маблағлар ипотека кредитларини молиялаштириш ва қайта молиялаштиришга йўналтирилади. Бу банклар ва ипотека ташкилотлари учун қўшимча молиявий ресурслар жалб қилиш имконини яратади.

Мутахассислар фикрича, ипотека облигациялари ипотека активларини ликвид молиявий инструментларга айлантириш имконини беради. Бу эса узоқ муддатли инвестицияларни жалб қилиш ва молия бозори иштирокчилари учун янги имкониятлар яратишга хизмат қилади.

Капитал бозори ривожланади

Истиқболли лойиҳалар миллий агентлигига кўра, ипотека облигациялари бозорининг шаклланиши мамлакат капитал бозорини чуқурлаштириш ва молиявий инструментлар турини кенгайтиришга ёрдам беради.

Шунингдек, мазкур механизм иқтисодиётда молиявий ресурсларни самарали қайта тақсимлаш, уй-жой қурилиши соҳасини қўллаб-қувватлаш ва узоқ муддатли инвестицияларни жалб қилиш учун муҳим аҳамият касб этади. Пилот чиқарилиш эса келгусида ушбу бозорни кенгайтириш учун асос бўлиши кутилмоқда.