Ўзбекистондан кибержиноятга алоқадор 18,8 мингта банк картаси блокланди
2026-йилнинг январ-июн ойларида 13 мингдан ортиқ фуқароларга етказилган 120 млрд 496 млн сўмдан зиёд моддий зарар қайтарилган. Шунингдек, 29 трлн сўмнинг ноқонуний равишда четга чиқиб кетишининг олди олинган.
Ўзбекистонда 2026-йилнинг биринчи ярмида 9 282 та кибержиноят фош этилди. Бу ҳақда Ички ишлар вазири раҳбарлигида ўтказилган навбатдаги ҳайъат йиғилишида маълум қилинди.
Маълумотларга кўра, 2026 йил вазирлик тизимида «Кибержиноятларга қарши курашиш йили», деб эълон қилиниб, кибержиноятларнинг олдини олиш, аҳоли ўртасида киберхавфсизлик маданиятини ошириш ва фуқароларни интернетдаги мавжуд хавфлардан огоҳлантиришга қаратилган профилактик тадбирлар кескин кучайтирилган. Марказий банк билан ҳамкорликда ишга туширилган махсус тизим орқали 29 трлн сўм маблағнинг ноқонуний равишда четга чиқиб кетишининг олди олинган. Шунингдек, жиноятларга алоқадор 18 838 та банк картаси блокланган.
120 млрд сўм қайтарилди
Аниқланган кибержиноятларнинг 4 011 таси ички ишлар органларининг ташаббуси билан фош этилган. Кўрилган чоралар натижасида 13 мингдан ортиқ фуқарога етказилган 120 млрд 496 млн сўмдан зиёд моддий зарар қайтарилган.
Кибержиноятларнинг олдини олишда профилактикага ҳам алоҳида эътибор қаратилган. Вазирлик маълумотларига кўра, тарғибот тадбирлари орқали мамлакат аҳолисининг қарийб 23 миллиони қамраб олинган.
Бу ишлар фуқароларни интернетдаги фирибгарлик, молиявий хавфлар ва бошқа кибержиноятлардан ҳимоя қилишга қаратилган. Бироқ йиғилишда амалга оширилаётган чоралар ҳали етарли эмаслиги танқид қилинган.
Мурожаатларни чуқур ўрганиш, жиноятларнинг содир этилиш сабаблари ва уларга имкон бераётган омилларни таҳлил қилиш зарурлиги таъкидланган.
Киберхавфсизлик кучайтирилади
Ички ишлар органлари ходимларининг киберхавфсизлик соҳасидаги билим ва кўникмаларини мунтазам ошириш бўйича вазифалар белгиланди. Ходимларни замонавий ахборот технологиялари ва кибержиноятларни аниқлаш усулларига ўргатиш ишларини жадаллаштириш топширилди.
Шу билан бирга, кибержиноятларга қарши курашиш фақат жиноят содир бўлганидан кейин чора кўриш билан чекланмаслиги белгиланди. Профилактика, молиявий операцияларни назорат қилиш ва аҳолининг рақамли саводхонлигини ошириш асосий йўналишлардан бири бўлиб қолади.