Ўзбекистонга 8 ойда 54,8 мингта электромобиль импорт қилинди
Январь–август ойларида мамлакатга олиб кирилган электромобилларнинг умумий қиймати 614,4 млн долларни ташкил этди. Бир дона электромобилнинг ўртача импорт нархи эса ўтган йилга нисбатан 9,5 фоизга арзонлаган.
© BloombergЎзбекистонга 2026 йил январь–август ойларида жами 614,44 млн долларлик 54 826 та электромобиль импорт қилинди. Бу ҳақда Божхона қўмитаси маълумотларида келтирилган.
Импорт қилинган электромобиллар сони 2025 йилнинг мос давридаги 28 920 тага нисбатан 89,63 фоизга кўпайган.
Шу билан бирга, электромобилларнинг ўртача импорт қиймати пасайган. Жорий йилнинг дастлабки 8 ойида бир дона электромобиль ўртача 11 207 доллардан импорт қилинган бўлса, 2025 йилнинг шу даврида бу кўрсаткич 12 389 долларга тенг бўлган.
Шундай қилиб, бир йил давомида электромобилнинг ўртача импорт нархи 1 182 долларга ёки 9,5 фоизга камайган.
Июль ойида энг кўп электромобиль олиб кирилган
Ойлар кесимида энг кўп электромобиль июль ойида импорт қилинган — 8 875 та. Август ойида эса 8 076 та электромобиль мамлакатга олиб кирилган.
Энг кам кўрсаткич январь ва февраль ойларида қайд этилган. Ушбу ойларда мос равишда 4 548 та ва 5 152 та электромобиль импорт қилинган.
Қолган ойлардаги импорт ҳажми қуйидагича:
- март — 6 662 та;
- апрель — 6 716 та;
- май — 6 952 та;
- июнь — 7 845 та.
Июнь ойида электромобиллар савдоси ҳам ошган
Аввалроқ июнь ойида Ўзбекистонда электромобиллар савдоси сезиларли даражада ошгани хабар қилинганди. Ой давомида бирламчи ва иккиламчи бозорларда жами 8,4 мингта электромобиль олди-сотди қилинган.
Бу кўрсаткич май ойига нисбатан қарийб 63,5 фоизга юқори бўлган.
