Рамазон ҳайити муносабати билан Президентга кимлар табрик йўллади?

Ўзбекистон Республикаси Президенти Шавкат Мирзиёев номига Ийд ал-Фитр — Рамазон ҳайити муносабати билан хорижий давлатлар ва ҳукуматлар раҳбарлари, шунингдек, халқаро ташкилотлар ва диний арбоблардан қутловлар келиб тушди. Бу ҳақда президент матбуот хизмати маълум қилди.

Табрикномаларда асосан Ўзбекистон халқига тинчлик, барқарорлик ва фаровонлик тилаклари билдирилган. Шу билан бирга, мамлакат билан дўстона муносабатларни мустаҳкамлаш ва ўзаро манфаатли ҳамкорликни кенгайтиришга тайёрлик алоҳида таъкидланган.

Жумладан, Саудия Арабистони подшоҳи Салмон бин Абдулазиз Ол Сауд ва валиаҳд Муҳаммад бин Салмон, Туркия президенти Ражаб Таййиб Эрдоған, Қозоғистон раҳбари Қосим-Жомарт Тўқаев, Қирғизистон президенти Садир Жапаров, Тожикистон президенти Эмомали Раҳмон каби қатор давлат раҳбарлари ўз табрикларини йўллаган.

Шунингдек, Бирлашган Араб Амирликлари, Миср, Эрон, Покистон, Ҳиндистон ва бошқа давлатлар етакчилари ҳам қутловлар йўллади. Улар орасида Эрон президенти Масъуд Пезешкиён ва Ҳиндистон бош вазири Нарендра Моди каби сиёсий етакчилар ҳам бор.

Бундан ташқари, БМТ тизими, Шанхай ҳамкорлик ташкилоти, Туркий давлатлар ташкилоти, Ислом ҳамкорлик ташкилоти каби нуфузли халқаро ва минтақавий тузилмалар раҳбарлари ҳам табриклар билан чиққан. Диний соҳада эса Ал-Азҳар раҳбари Аҳмад ат-Тоиб ва бошқа йирик уламолар ўз тилакларини билдирган.